Հանքարդյունաբերության ոլորտի վերահսկողությունը կթվայնացվի․ համակարգը կգործարկվի 2029-ին

Հայաստանում հանքարդյունաբերության ոլորտի վերահսկողության նոր թվային համակարգ կստեղծվի, որը նախատեսվում է գործարկել 2029 թվականի հունվարից։ Այս մասին հոկտեմբերի 17-ին Ծաղկաձորում՝ Mining Armenia Forum 2026 համաժողովի ընթացքում, հայտարարել է Բնապահպանության և ընդերքի տեսչական մարմնի ղեկավար Հովհաննես Մարտիրոսյանը։

Նրա խոսքով՝ Հայաստանում խնդիրներ կան ելակետային տվյալների ճշգրտության և ոլորտում առաջացած հետևանքների արձանագրման հարցում։ Գործող կարգավորումների համաձայն՝ տեսչական մարմինն արձանագրում է արդեն իսկ առաջացած հետևանքները, իսկ ռիսկային իրավիճակները հիմնականում բացահայտվում են տնտեսվարողներին այցելությունների ընթացքում։

Նոր համակարգի միջոցով նախատեսվում է առցանց հավաքագրել մշտադիտարկման բոլոր տվյալները և դրանց վերլուծության հիման վրա կայացնել վերահսկողական որոշումներ։

Մարտիրոսյանի խոսքով՝ հանքարդյունաբերությունը բարձր ռիսկային ոլորտ է, ուստի դրա նկատմամբ վերահսկողությունը պետք է լինի համարժեք։