Երեք անչափահասներ հրկիզել են «Ռիբոկ» մարզական ակումբի էլեկտրական համակարգը․ վնասը՝ 2.2 մլն դրամ

Երևանի Դավիթաշեն վարչական շրջանում երեք անչափահասներ, ըստ հաղորդման, հրկիզել են «Ռիբոկ» սպորտային ակումբի էլեկտրական սնուցման համակարգը՝ պատճառելով 2 մլն 200 հազար դրամի գույքային վնաս։

Ինչպես հայտնում է ֆոտոլրագրող Գագիկ Շամշյանը, դեպքը տեղի է ունեցել սեպտեմբերի 21-ին։ Ժամը 16։10-ի սահմաններում ոստիկանության Դավիթաշենի բաժնում օպերատիվ տեղեկություն է ստացվել, որ ակումբի տարածքում էլեկտրական լարեր են այրվում։

Ոստիկանությանը դիմած՝ Երևանի բնակիչ Արմենուհի Գ.-ի հաղորդմամբ՝ ժամը 16։00-ի սահմաններում երեք անչափահաս, անցնելով Փիրումյանների փողոցի թիվ 40/2 շենքի բակի պարսպի վրայով, մուտք են գործել ակումբի տարածք և դիտավորյալ հրկիզել դրա հետնամասում գտնվող էլեկտրական սնուցման համակարգը։

Դեպքի առթիվ կազմված փաստաթղթերն ուղարկվել են Քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժին։ Դեպքի հանգամանքները պարզվում են։