«Շերեմետևո»-ում ուղևորները ժամերով սպասում են թռիչքներին՝ առանց ջրի և սննդի, մարդիկ քնում են հատակին

Մոսկվայի «Շերեմետևո» օդանավակայանում չվերթների ուշացումների պատճառով ուղևորները ժամեր շարունակ սպասում են մեկնելուն՝ հայտնվելով ծանր պայմաններում։ Ալմաթի մեկնող ուղևորների փոխանցմամբ՝ հոկտեմբերի 17-ի գիշերը նրանց արդեն նստեցրել էին ինքնաթիռ, սակայն կարճ ժամանակ անց պահանջել են իջնել և վերադառնալ օդանավակայան։

Դրանից հետո մարդիկ երկար ժամանակ մնացել են տարանցիկ գոտում։ Չվերթի մեկնելու ժամն այդ ընթացքում չորս անգամ փոխվել է։

Ուղևորների խոսքով՝ երկարատև սպասումից ուժասպառ եղած մարդիկ ստիպված են եղել քնել հատակին։ Օդանավակայանում են եղել նաև երեխաներով ընտանիքներ։

«Մարդիկ մնացել են առանց ջրի, սննդի և հյուրանոցի։ Գիշերվա ընթացքում 800 ռուբլու սննդի կտրոն են տրամադրել, բայց նշված սրճարաններում սնունդն արդեն սպառված էր։ Մեր չվերթները կարծես մոռացության են մատնվել, մեզ մոտ ոչ ոք չի գալիս»,– դժգոհել են ուղևորները։

Ավելի վաղ հաղորդվել էր, որ Մոսկվայի օդանավակայաններում գիշերային թռիչքային սահմանափակումների պատճառով հետաձգվել և չեղարկվել է ավելի քան 370 չվերթ։ Օդային տարածքի սահմանափակումները գործել են կեսգիշերից մինչև առավոտյան ժամը 7-ը։