Եմենի հութիները վերջնագրի ժամկետի ավարտից հետո սկսել են Թաիզի գրավման գործողությունը

Եմենյան «Անսար Ալլահ» շարժման զինված կազմավորումները (հութիներ) վերջնագրի ժամկետի ավարտից հետո սկսել են Թաիզ քաղաքից հակառակորդներին դուրս մղելու գործողությունը, հաղորդում է Hamer Intel-ը։

Ստացվող հաղորդագրությունների համաձայն, հարձակումն իրականացվում է արևմտյան, հյուսիսարևմտյան և հարավային ուղղություններից։

Արևմտյան ուղղությամբ հութիները, ինչպես տեղեկացվում է, վերահսկողություն են հաստատել Ալ-Արիել բարձունքի նկատմամբ և փորձում են մաքրել Ալ-Մուրբա թաղամասը։

Հյուսիսարևմուտքում «Անսար Ալլահ»-ի մարտիկները իրենց հակառակորդ ուժերին դուրս են մղել Մադարատ և Ար-Ռաջմա շրջաններից և առաջ են շարժվում դեպի հին օդանավակայան, որտեղ տեղակայված է 35-րդ բրիգադի շտաբը։ Կենտրոնական բանտի շրջանում բախումները շարունակվում են, ընդ որում, առկա հաղորդագրությունների համաձայն, ճակատի գիծը մնում է առանց էական փոփոխությունների։

Հարավային ուղղությամբ հութիները հայտարարել են Թալուք շրջանի գրավման մասին։ Մարտական գործողությունները տեղափոխվել են Մաշրաա և Հադնան շրջաններ։

Թաիզը կարևոր ռազմավարական նշանակություն ունի Եմենի հարավարևմուտքի նկատմամբ վերահսկողության համար։ Քաղաքը գտնվում է երկրի մայրաքաղաք Սանայից մոտավորապես 256 կմ հարավ և համարվում է Եմենի կարևորագույն մշակութային կենտրոններից մեկը։ Գնահատականների համաձայն, նրա բնակչությունը կազմում է շուրջ 600 հազար մարդ։

Ներկայումս Թաիզը շարունակում է մնալ հութիների և Սաուդյան Արաբիայի կողմից աջակցվող ուժերի միջև դիմակայության առանցքային սահմանագծերից մեկը։ «Անսար Ալլահ»-ի հակառակորդների թվում են «Իսլահ» կուսակցության հետ կապված կազմավորումները, ինչպես նաև այլ զինված խմբավորումներ։

Թաիզի համար մարտերը սրվել են Եմենում լայնածավալ ռազմական գործողությունների վերսկսման ֆոնին։ Քաղաքի նկատմամբ վերահսկողությունը կարող է էապես փոխել երկրի հարավարևմուտքում ուժերի դասավորությունը և ազդել հակամարտության հետագա ընթացքի վրա։