Լատվիան արգելել է Հայաստանից ներմուծված կանաչ թեյի խմբաքանակի վաճառքը՝ թունաքիմիկատների պատճառով

Լատվիայի Սննդի և անասնաբուժական ծառայությունը Հայաստանից ներմուծված 57,6 կգ կանաչ թեյի խմբաքանակում հայտնաբերել է ԵՄ-ում արգելված թունաքիմիկատ, ինչպես նաև երկու այլ թունաքիմիկատների թույլատրելի չափաքանակների գերազանցում։ Այս մասին հայտնում են տեղական լրատվամիջոցները՝ հղում անելով գերատեսչությանը։

Լաբորատոր հետազոտությունների արդյունքում թեյում հայտնաբերվել են տոլֆենպիրադի մնացորդներ, իսկ լամբդա-ցիհալոտրինի և թիամեթոքսամի պարունակությունը գերազանցել է սահմանված նորմերը։

Խախտումներ են հայտնաբերվել նաև Ղազախստանից ներմուծված 22 տոննա մանանեխի սերմերի խմբաքանակում․ էռուկաթթվի պարունակությունը գերազանցել է թույլատրելի մակարդակը։

Լատվիայի Սննդի և անասնաբուժական ծառայությունը հայտնել է, որ երկու խմբաքանակների իրացումն արգելվել է։ Արտադրանքը նախատեսվում է ոչնչացնել կամ արտահանել Եվրամիության տարածքից դուրս։

Խախտումների վերաբերյալ տեղեկատվությունը փոխանցվել է սննդամթերքի և կերերի անվտանգության վերաբերյալ ԵՄ արագ ահազանգման համակարգին։