Ռուսաստանի քաղաքացիություն ստանալու համար մշտական բնակության ժամկետը կարող է երկարացվել մինչև 8 տարի

ՌԴ Պետդումայի ԼԴԿ խմբակցության պատգամավորները օրինագիծ են մշակել, որով առաջարկվում է Ռուսաստանի քաղաքացիություն ստանալու համար օտարերկրացիների՝ երկրում մշտական բնակության անհրաժեշտ ժամկետը 5 տարուց հասցնել 8-ի։ Այս մասին հայտնում է ՏԱՍՍ-ը։

Օրինագիծն ուղարկվել է Ռուսաստանի կառավարություն՝ եզրակացություն ստանալու համար։

Առաջարկվում է նաև կացության թույլտվություն ստանալու համար երկրում բնակության պահանջվող ժամկետը մեկ տարուց երկարացնել մինչև երկու տարի։ Ընդ որում, դիմումը հնարավոր կլինի ներկայացնել Ռուսաստանում բնակության երկրորդ տարվա միայն ութ ամիսը լրանալուց հետո։

Նախաձեռնության հեղինակների խոսքով՝ փոփոխությունների նպատակն է իրականացնել պետական միգրացիոն քաղաքականությունը, ապահովել ազգային անվտանգությունը և բարձրացնել օտարերկրացիների՝ ռուսական հասարակությանը ինտեգրվելու արդյունավետությունը։

ԼԴԿ առաջնորդ Լեոնիդ Սլուցկին ՏԱՍՍ-ին հայտնել է, որ 2026 թվականի առաջին եռամսյակում Ռուսաստանում օտարերկրացիների ավելի քան 8 հազար կացության թույլտվություն է չեղարկվել, ինչը 90 տոկոսով ավելի է նախորդ տարվա նույն ժամանակահատվածի ցուցանիշից։

Որպես պատճառներ նշվել են փաստաթղթերը ձևակերպելիս ոչ հավաստի տեղեկությունների տրամադրումը և ազգային անվտանգությանը սպառնացող գործողությունները։ Սլուցկու կարծիքով՝ գործող կարգը պետք է բարեփոխել, որպեսզի պետությունն ավելի շատ ժամանակ ունենա օտարերկրացիներին ստուգելու համար։

Նշենք, որ խոսքը օրինագծի մասին է, և առաջարկվող փոփոխությունները դեռ ուժի մեջ չեն մտել։