Սուրենյանց․ Փաշինյանը ժողովրդավարության պաշտպանության քողի տակ փորձում է սահմանափակել քաղաքական մրցակցությունը

Քաղաքագետ Սուրեն Սուրենյանցը քննադատել է վարչապետ Նիկոլ Փաշինյանի՝ ՏԻՄ ընտրությունների ընթացքում հնարավոր ճնշումների և ժողովրդավարության պաշտպանության մասին հայտարարությունը՝ այն որակելով որպես քաղաքական մրցակցությունը սահմանափակելու վտանգավոր մոտեցում։

Սուրենյանցի խոսքով՝ խնդրահարույց է այն հարցը, թե ով պետք է որոշի, թե քաղաքական որ ուժն է ժողովրդավարական, իսկ որը՝ հակաժողովրդավարական։ Նրա գնահատմամբ՝ Փաշինյանն իրեն և իր թիմին ներկայացնում է ոչ թե որպես քաղաքական մրցակցության մասնակից, այլ որպես ժողովրդավարության ինքնահռչակ պաշտպան և արբիտր։

Քաղաքագետը հիշեցրել է, որ ժողովրդավարության առանցքային հատկանիշներից մեկը իշխանության փոփոխելիությունն է։ Նրա կարծիքով՝ եթե իշխանությունը քաղաքական հակառակորդի հնարավոր հաղթանակը նախապես ներկայացնում է որպես ժողովրդավարության սպառնալիք, կարող է վտանգվել ընտրողների կամքի ազատ արտահայտումը։

Սուրենյանցը նաև զուգահեռներ է անցկացրել Հայաստանի և Եվրոպայի քաղաքական գործընթացների միջև՝ նշելով, որ քաղաքական մրցակցության սահմանափակման փորձերը կարող են խորացնել հասարակության և քաղաքական ինստիտուտների միջև անվստահությունը։

Անդրադառնալով Հայաստանին՝ նա ընդգծել է, որ ՏԻՄ ընտրություններում հնարավոր ճնշումների մասին ահազանգերը պետք է անկախ քննության ենթարկվեն՝ անկախ այն հանգամանքից, թե ում քաղաքական շահերին կարող են ծառայել ենթադրյալ խախտումները։

«Հայաստանի քաղաքական համակարգի գոյությունը չի կարող պայմանավորվել գործող իշխանության անփոխարինելիությամբ»,- գրել է Սուրենյանցը՝ հավելելով, որ ժողովրդավարության պաշտպանությունը պետք է հիմնված լինի հավասար քաղաքական մրցակցության, ընդդիմության իրավունքների, իրավապահ մարմինների անաչառության և ընտրությունների նկատմամբ հանրային վստահության ապահովման վրա։