Թուրքիան նշել է Սիրիայից և Իրաքից զորքերը դուրս բերելու պայմանը

Թուրքիան կպահպանի իր ռազմական ներկայությունը Սիրիայում և Իրաքում այնքան ժամանակ, քանի դեռ չի ապահովվել նրա սահմանների անվտանգությունը այդ երկու երկրի հետ։ Դրա մասին AFP գործակալության հարցերին գրավոր պատասխանում հայտարարել է Թուրքիայի պաշտպանության նախարար Յաշար Գյուլերը։

«Մենք պահպանում ենք մեր ռազմական ներկայությունը Իրաքում և Սիրիայում։ Երբ համարենք, որ տարածաշրջանային անվտանգության և սահմանների անվտանգության տեսանկյունից անհրաժեշտ պայմանները կատարված են, մեր բազաների և տարածաշրջանում մեր ներկայության կարգավիճակը կվերանայվի»,- հայտնել է թուրք նախարարը։

Թուրքիան երկար տարիներ զորքեր է տեղակայում Սիրիայի և Իրաքի հյուսիսում՝ ձգտելով կանխել Թուրքիայում արգելված Քուրդիստանի աշխատավորական կուսակցության (ՔԱԿ) և «Իսլամական պետություն» (ԻՊ) խմբավորման զինյալների կողմից բխող սպառնալիքները։

Սակայն իրավիճակը փոխվել է Սիրիայում Բաշար Ասադի ռեժիմի տապալումից և Անկարայի հետ համագործակցությանն ուղղված կառավարության իշխանության գալուց հետո։ Ըստ Գյուլերի՝ Թուրքիան անվտանգության ոլորտում սերտորեն համագործակցում է սիրիական նոր իշխանությունների հետ։ Թուրք զինվորականներն օգնում են ամրապնդելու սիրիական բանակի հնարավորությունները և ապահովել սահմանների անվտանգությունը։

«Երբ տարածաշրջանում ահաբեկչական սպառնալիքը լիովին վերացվի, սահմանների անվտանգությունն ապահովվի, իսկ պետական իշխանությունը առանց բացառության և ամբողջ ծավալով հաստատվի Սիրիայի ամբողջ տարածքում, մեր ուժերի կարգավիճակը կվերանայվի»,- հայտարարել է պաշտպանության նախարարության ղեկավարը։

Ասադի ռեժիմի անկման պահին Սիրիայի հյուսիսում 16-ից 18 հազար թուրք զինծառայող կար, հայտնել է թուրք պաշտոնյան։ Ներկա պահին զորախմբի թվաքանակի վերաբերյալ հավաստի տվյալներ չկան։ Գյուլերը հրաժարվել է բացահայտել զորքերի տեղակայման հնարավոր ծրագրերը և ընդգծել է, որ հետագա որոշումները հաշվի կառնեն Սիրիայի ինքնիշխանությունն ու տարածքային ամբողջականությունը, տեղերում առկա իրավիճակը և ահաբեկչական սպառնալիքի բնույթը։

Թուրք զինվորականներն Իրաքում են 2015 թվականից և պարբերաբար իրականացնում են սահմանանց գործողություններ ու ավիահարվածներ ՔԱԿ-ի դիրքերի ուղղությամբ։ Իրաքյան անվտանգության ոլորտի աղբյուրի տվյալներով՝ այնտեղ այժմ տեղակայված է 800-1000 թուրք զինծառայող։ Նրանց ներկայությունը շարունակում է մնալ Անկարայի և Բաղդադի հարաբերություններում լարվածության գործոններից մեկը։

Թուրքիան նաև ուշադիր հետևում է ՔԱԿ-ի հետ բազմամյա հակամարտության դադարեցման գործընթացին։ Անցյալ տարի քուրդ զինյալները խորհրդանշական կերպով ոչնչացրել էին զենքը, իսկ հոկտեմբերին, թուրքական հետախուզության տվյալներով, լքել էին Իրաքի հյուսիսի չորս առանցքային բազա։ Գյուլերն ընդգծել է, որ այս գործընթացը չի նշանակում անվտանգության միջոցների թուլացում․ Անկարան կշարունակի հետևել ՔԱԿ-ի լուծարման մասին որոշման կատարմանը։

Բացի դրանից, Թուրքիան «աջակցում է Բաղդադի ջանքերին՝ զինված խմբավորումների զինաթափման և դրանց նկատմամբ պետական վերահսկողություն հաստատելու ուղղությամբ»։ Անցյալ ամիս Անկարան հայտարարել էր Մոսուլի մերձակայքում իր Բաշիկա բազայի նկատմամբ վերահսկողությունն աստիճանաբար Իրաքին փոխանցելու մտադրության մասին։ Ըստ Գյուլերի՝ Թուրքիան ակնկալում է Իրաքի հետ ռազմական և պաշտպանական համագործակցությունը բարձրացնել ավելի բարձր մակարդակի։