ՊԵԿ-ը հերքում է ծխախոտի մաքսանենգության դեպքի բացահայտումը լրատվամիջոցների հրապարակումների հետ կապելու պնդումները

Պետական եկամուտների կոմիտեն հայտարարություն է տարածել՝ անդրադառնալով վերջին օրերին որոշ լրատվամիջոցներում մաքսային հսկողությունից թաքցված ծխախոտի արտահանման դեպքի վերաբերյալ հրապարակումներին։

ՊԵԿ-ի պնդմամբ՝ դեպքը բացահայտվել է կոմիտեի համապատասխան ստորաբաժանումների հսկողական աշխատանքի արդյունքում, իսկ տեղեկատվական նյութերը պատրաստվել և մոնտաժվել էին հրապարակումից օրեր առաջ։

Կոմիտեն նաև ընդգծել է, որ Զվարթնոցի «Կարգո» բեռնային համալիրում հայտնաբերված ծխախոտի տուփերի և արտաքին փաթեթավորման վրա չկան նշումներ, որոնք կհաստատեին դրանց՝ Ագարակի մաքսային անցակետով ՀՀ տարածք ապօրինի տեղափոխված լինելու հանգամանքը։

ՊԵԿ-ի տվյալներով՝ 2026 թվականի հունվարից սեպտեմբեր մաքսանենգության դեմ պայքարի շրջանակում հայտնաբերվել է շուրջ 209 հազար տուփ ծխախոտ՝ 49%-ով ավելի, քան 2025 թվականի ամբողջ տարվա ցուցանիշը, և 122%-ով ավելի, քան 2024 թվականին։

Բացի այդ, Ագարակի սահմանային անցակետում և ցամաքային սահմանային անցակետերում մաքսային հսկողության միջոցներով 2026 թվականի ինն ամիսներին հայտնաբերվել է շուրջ 575 հազար տուփ ծխախոտ, ինչը 31%-ով գերազանցում է 2025 թվականի ամբողջ տարվա ցուցանիշը։

ՊԵԿ-ը լրատվամիջոցներին հորդորել է զերծ մնալ չճշտված տեղեկությունների և չհիմնավորված մեկնաբանությունների տարածումից՝ ընդգծելով, որ մաքսանենգության դեպքերի բացահայտումները մաքսային ծառայության ամենօրյա աշխատանքի արդյունք են։