Միրզոյան․ TRIPP-ի աշխատանքները կարող են մեկնարկել 2026-ի վերջին կամ 2027-ի սկզբին

ԱԺ արտաքին հարաբերությունների մշտական հանձնաժողովի նիստում քննարկվել է ՀՀ-ի և ԱՄՆ-ի միջև «Թրամփի ուղի հանուն միջազգային խաղաղության և բարգավաճման» (TRIPP) նախագծի վերաբերյալ ռազմավարական համագործակցության շրջանակային համաձայնագրի վավերացման հարցը։

Քննարկման ընթացքում «Քաղաքացիական պայմանագիր» խմբակցության պատգամավոր Նատալյա Սինորյանը նշեց, որ Սյունիքի մարզի բնակիչներին հետաքրքրում է, թե երբ կմեկնարկեն TRIPP նախագծի շինարարական աշխատանքները։

ՀՀ արտաքին գործերի նախարար Արարատ Միրզոյանը հայտնեց, որ այս պահին կան որոշակի կանխատեսումներ և պատկերացումներ նախագծի իրականացման ժամկետների վերաբերյալ։

«Ահագին ժամանակ է, և հիմա էլ տրամադրված ենք այնպես արագ աշխատել, որ արդեն 2026-ի վերջում ինչ-որ աշխատանքներ սկսենք։ Դեռ սա իրատեսական է, բայց ավելի իրատեսական է 2027-ի սկիզբը»,- ասաց նախարարը։

Միրզոյանի խոսքով՝ այս պահին իրականացվում են մաքրման, տեխնիկական գնահատման և նախապատրաստական աշխատանքներ։ Նա նաև ընդգծեց, որ խոսքը դեռևս ռելսերի տեղադրման մասին չէ։