Լիվերպուլում կբացվի The Beatles-ի հսկայական թանգարան․ այն 4 անգամ մեծ կլինի ներկայիս թանգարանից

2028 թվականին Լիվերպուլի կենտրոնում կբացվի The Beatles խմբի պատմությանը նվիրված նոր թանգարան։ Այն կունենա 9300 քառակուսի մետր տարածք՝ ներկայիս թանգարանից մոտ չորս անգամ ավելի։

Նախագիծը հավանության են արժանացրել խմբի անդամներ Փոլ Մաքքարթնին և Ռինգո Սթարը։ Թանգարանը կտեղակայվի քաղաքի ամենամեծ փակ շուկայի վերակառուցված շենքում, իսկ հայտնի St Johns Beacon հեռուստաաշտարակում կստեղծվի «Դեղին սուզանավ» երգին և մուլտֆիլմին նվիրված հատուկ տարածք։

Apple Corps-ի իրականացրած նախագծի շրջանակում այցելուները ինտերակտիվ տեխնոլոգիաների միջոցով հնարավորություն կունենան վերապրել խմբի պատմության կարևոր դրվագները՝ հետպատերազմյան Լիվերպուլից և Համբուրգից մինչև Լոնդոնի Abbey Road ստուդիան և ԱՄՆ-ում խմբի լեգենդար ելույթը։

Թանգարանում կներկայացվեն նաև The Beatles-ի պատմության հետ կապված բնօրինակ իրեր։ Տոմսերի վաճառքից ստացված հասույթի մի մասը կուղղվի Լիվերպուլի սկսնակ երաժիշտներին և արվեստի ներկայացուցիչներին աջակցող բարեգործական կազմակերպությանը։

«Ես սիրում եմ Լիվերպուլը։ Այն իմ անբաժանելի մասն է և The Beatles-ի մի մասը։ Մեծ պատիվ է, որ մարդկանց դեռ հետաքրքրում է մեր պատմությունը»,- ասել է Փոլ Մաքքարթնին։