Իրանը պատրաստ է ԱՄՆ-ի հետ արդար և արժանապատիվ համաձայնության հասնել. Արաղչի

Իրանը ձգտում է ԱՄՆ-ի հետ արդար և արժանապատիվ համաձայնության հասնել, սակայն դրա համար Վաշինգտոնը պետք է անկեղծ պատրաստակամություն ցուցաբերի՝ դադարեցնելու իր ագրեսիվ գործողությունները։ Այս մասին Financial Times-ում հրապարակված հոդվածում գրել է Իրանի արտաքին գործերի նախարար Սեյեդ Աբբաս Արաղչին։

Նրա խոսքով՝ Թեհրանը վճռական է հակամարտության խաղաղ կարգավորմանը հասնելու հարցում, բայց միաժամանակ լիովին պատրաստ է պաշտպանել իրեն։ Արաղչին նշել է, որ ԱՄՆ նախագահ Դոնալդ Թրամփը պատերազմը սկսել է Իրանի դիմադրողականության և վճռականության վերաբերյալ սխալ պատկերացումների հիման վրա։

Իրանի արտգործնախարարը նաև ընդգծել է, որ Թեհրանը չի վստահում ԱՄՆ կառավարության՝ խաղաղության հասնելու անկեղծ ցանկության մասին հայտարարություններին։ Նրա խոսքով՝ 2025 թվականի հունիսին և 2026 թվականի փետրվարին Իրանը ենթարկվել է ռմբակոծությունների ակտիվ բանակցությունների ընթացքում։ Արաղչիի պնդմամբ՝ այս տարվա հունիսին՝ Իրանի նախագահ Մասուդ Փեզեշքիանի և Թրամփի միջև համաձայնության ձեռքբերումից կարճ ժամանակ անց, երկիրը կրկին ենթարկվել է հարձակման։

«Ինչպե՞ս կարելի է կրկին վստահել ԱՄՆ նախագահին»,- ասել է Արաղչին։

Նա նշել է, որ ստեղծված պայմաններում առաջընթացի հասնելու քիչ հիմքեր կան, քանի որ Վաշինգտոնը պատրաստակամություն չի ցուցաբերում փոխըմբռնման հասնելու և չի հրաժարվում ուժի կիրառման նոր սպառնալիքներից։

Արաղչիի խոսքով՝ տարածաշրջանում լարվածության վերջին սրացումը ցույց է տալիս, թե որքան արագ կարող է հակամարտությունն ընդլայնվել և ինչ մասշտաբների կարող են հասնել դրա հետևանքները՝ լուրջ վտանգ ներկայացնելով միջազգային խաղաղության և անվտանգության համար։

Այնուամենայնիվ, Իրանի արտգործնախարարը հայտնել է, որ ՄԱԿ-ի Գլխավոր ասամբլեայի վերջին նստաշրջանի ընթացքում միջնորդների միջոցով ԱՄՆ-ին ներկայացրել է յոթօրյա ծրագիր՝ պատերազմը դադարեցնելու և Հորմուզի նեղուցը բացելու համար։

Նրա ներկայացմամբ՝ առաջարկը նախատեսում է, որ վեցերորդ օրը Հորմուզի նեղուցը կբացվի, իսկ յոթերորդ օրվանից կվերսկսվեն վերջնական համաձայնության հասնելու բանակցությունները։ Արաղչին ընդգծել է, որ ծրագրի իրականացման դեպքում տարածաշրջանում կյանքն աստիճանաբար կվերադառնա բնականոն հուն։