Իտալիան խստացնում է զանգվածային անկարգություններին մասնակցելու պատիժը

Իտալիայի վարչապետ Ջորջա Մելոնին հանդես է եկել ուղերձով՝ հայտարարելով, որ կառավարությունը նոր խիստ միջոցառումներ է ընդունել՝ երկրում անկարգությունները կանխելու և դրանց մասնակիցներին պատասխանատվության ենթարկելու համար։ Որոշումը հաջորդել է Միլանում և Իտալիայի այլ քաղաքներում տեղի ունեցած բախումներին, խանութների թալանին և իրավապահների վրա հարձակումներին։

Մելոնիի խոսքով՝ անկարգությունների հետևանքով վիրավորվել է մոտ 200 իրավապահ, իսկ միայն Միլանում պատճառված վնասը, ըստ Confcommercio առևտրային կազմակերպության գնահատականի, կազմում է շուրջ մեկ միլիոն եվրո։ Իրավապահները ձերբակալել են 330 մարդու, որոնց մոտ կեսը, վարչապետի փոխանցմամբ, օտարերկրյա ծագում ունի։

«Մենք տեսել ենք Միլանում և Իտալիայի այլ քաղաքներում տեղի ունեցած բռնությունների պատկերները՝ թալանված խանութներ, ջարդված ցուցափեղկեր, հարձակման ենթարկված իրավապահներ։ Սրանք անընդունելի տեսարաններ են, որոնք ոչ ոք չի կարող փորձել նվազեցնել կամ արդարացնել»,- հայտարարել է Մելոնին։

Կառավարության ընդունած նոր միջոցառումներով՝ հանրային ցույցերի ընթացքում առնվազն հինգ հոգուց բաղկացած խմբի կազմում բռնի գործողություններին մասնակցելու համար կարող է սահմանվել մինչև հինգ տարվա ազատազրկում և մինչև 20 հազար եվրոյի տուգանք։ Պատիժը կխստացվի, եթե մասնակիցները ծածկել են դեմքերը կամ վնասվածքներ են պատճառել մարդկանց։

Նախատեսվում է նաև, որ անչափահասների պատճառած վնասների համար ֆինանսական պատասխանատվություն կկրեն նրանց ծնողները։ Միլանում մինչև տարեվերջ կտեղակայվի լրացուցիչ 500 զինծառայող, իսկ անչափահասների արդարադատության համակարգը կհամալրվի լրացուցիչ դատավորներով և համապատասխան հաստատությունների տեղերով։

Վարչապետն առանձնահատուկ մտահոգություն է հայտնել այն տեղեկության կապակցությամբ, որ անկարգությունների ընթացքում հայտնաբերված ամենաերիտասարդ մասնակիցը կարող է ընդամենը 11 տարեկան լինել։

«Մենք չենք կարող թույլ տալ, որ երեխաները մեծանան՝ կարծելով, թե ցուցափեղկ ջարդելը հարգանք ձեռք բերելու միջոց է, կամ սոցիալական ցանցերում դիտումներ հավաքելն իրենց ապագայից ավելի կարևոր է»,- ասել է նա։

Մելոնին միաժամանակ ընդգծել է, որ կառավարությունը պատրաստ է երկխոսել խաղաղ բողոքի մասնակիցների հետ՝ լուծումներ գտնելու նրանց խնդիրներին։

«Սոցիալական դժվարությունները երբեք չեն կարող արդարացնել բռնությունը։ Երբ ցուցափեղկ է ջարդվում, դրա համար վճարում է ոչ թե ազդեցիկ պաշտոնյան, այլ առևտրականը, աշխատողը և թաղամասի բնակիչները՝ հենց այն սովորական մարդիկ, որոնց պաշտպանելու մասին ոմանք հայտարարում են»,- նշել է Իտալիայի վարչապետը։

«Խաղաղ ցույցերի մասնակցելը իրավունք է, իսկ մեր քաղաքներն ավերակների վերածելը՝ ոչ»,- եզրափակել է Մելոնին։