Սաուդյան Արաբիայի միջազգային օդանավակայանի վրա հարձակման հետևանքով կա 1 զոհ և 8 վիրավոր

Սաուդյան Արաբիայի Դամամ քաղաքի «Ֆահդ արքա» միջազգային օդանավակայանը հոկտեմբերի 21-ի երեկոյան ենթարկվել է հարձակման։ Այս մասին հայտնել է Սաուդյան Արաբիայի Քաղաքացիական ավիացիայի գլխավոր վարչությունը, փոխանցում է «Արմենպրես»-ը։

Հարձակման հետևանքով մեկ մարդ զոհվել է, ևս ութը ստացել են տարբեր աստիճանի ծանրության վնասվածքներ։

Սաուդյան Արաբիան գլխավորում է արաբական կոալիցիան, որը ռազմական աջակցություն է ցուցաբերում Եմենի կառավարական ուժերին՝ հութիների դեմ պայքարում։ Կոալիցիան ավիահարվածներ է հասցնում հութիների դիրքերին։

Ի պատասխան՝ վերջին շաբաթներին հութիները թիրախավորել են Էր Ռիադի «Խալիդ արքա» միջազգային օդանավակայանը, Սաուդյան Արաբիայի ռազմական օբյեկտները, նավթային ենթակառուցվածքներն ու ծովային նավագնացությունը։ Այս հարվածների հետևանքով թագավորությունում ևս գրանցվել են զոհեր և վիրավորներ։