Կաթողիկոսի եղբորն ու զարմիկին 7,5 տարվա ազատազրկում է սպառնում․ պաշտպանը բողոքարկելու է վճիռը

Ամենայն հայոց կաթողիկոս Գարեգին Բ-ի եղբոր՝ Գևորգ Ներսիսյանի և զարմիկի՝ Համբարձում Ներսիսյանի գործով լրացուցիչ դատական նիստի ընթացքում փաստաբան Սմբատ Մինասյանը խնդրել է նրանց նկատմամբ նվազագույն պայմանական պատիժ նշանակել։

Փաստաբանը նշել է, որ թեև պաշտպանական կողմը համաձայն չէ մեղադրական դատավճռի հետ և մտադիր է այն բողոքարկել, հաշվի առնելով դատարանի դիրքորոշումը՝ խնդրում է մեղադրյալների նկատմամբ սահմանել նվազագույն պայմանական պատիժ։

Մինասյանը նաև ուշադրություն է հրավիրել Գևորգ Ներսիսյանի առողջական վիճակին և Համբարձում Ներսիսյանի ընտանեկան դրությանը՝ նշելով, որ վերջինս երեք անչափահաս երեխաների միակ կերակրողն է։

«Ինչպես անեկդոտում են ասում՝ «ուղղակի այնպես» վեց ամիս ազատազրկում են տալիս, բայց այս դեպքում «ոչնչի» համար յոթ տարվա ազատազրկում են պահանջում։ Տարօրինակ է, որ դատախազը ցմահ ազատազրկում չի պահանջել»,– ասել է փաստաբանը։

Ավելի վաղ հանրային մեղադրողը պահանջել էր Գևորգ Ներսիսյանին դատապարտել 3 տարի 6 ամիս, իսկ Համբարձում Ներսիսյանին՝ 7 տարի 6 ամիս ազատազրկման։

Գևորգ և Համբարձում Ներսիսյանների դեմ քրեական վարույթը նախաձեռնվել է անցյալ տարվա նոյեմբերին Վաղարշապատում տեղի ունեցած տեղական ինքնակառավարման մարմինների ընտրությունների ժամանակ «Հանրապետություն» կուսակցության նախընտրական քարոզչությանը խոչընդոտելու մեղադրանքով։