Երեխաներին մեքենայով տեղափոխելու կանոնների խախտման տուգանքը կդառնա 20 հազար դրամ

Կառավարությունը հավանություն է տվել «Ճանապարհային երթևեկության անվտանգության ապահովման մասին» օրենքում լրացումներ և փոփոխություններ կատարելու, ինչպես նաև հարակից օրենքների նախագծերին։

Նախագծերի նպատակն է առավել արդյունավետ կանխարգելել թմրանյութերի ազդեցության տակ մեքենա վարելու դեպքերը, վերանայել ճանապարհային նշանների և երթևեկության կանոնների պահանջների խախտումների համար նախատեսված պատասխանատվությունը, ինչպես նաև կարգավորել անհատական շարժունակության միջոցների կիրառման ընթացքում առաջացած խնդիրները։

Մասնավորապես, ճանապարհատրանսպորտային պատահարների հետևանքով երեխաների վնասվածքների դեպքերը կանխելու նպատակով առաջարկվում է խստացնել երեխաներին տրանսպորտային միջոցներով տեղափոխելու կանոնների խախտման համար սահմանված պատասխանատվությունը։ Գործող 5 հազար դրամ տուգանքի փոխարեն նախատեսվում է սահմանել 20 հազար դրամ տուգանք և 1 տուգանային միավոր։

Փոփոխություններ են առաջարկվում նաև որոշ ճանապարհային նշանների պահանջները չկատարելու համար։ Մասնավորապես, «Մուտքն արգելվում է», «Բեռնատար ավտոմոբիլների երթևեկությունն արգելվում է» և «Երթևեկության ուղղություն բեռնատար ավտոմոբիլների համար» նշանների պահանջները խախտելու դեպքում նախատեսվում է տուգանք՝ սահմանված նվազագույն աշխատավարձի քսանապատիկի չափով, ինչպես նաև 2 տուգանային միավոր։

Բացի այդ, «Կանգառն արգելվում է» ճանապարհային նշանի կամ կանգառն արգելված տեղերը ցույց տվող ճանապարհային գծանշումների պահանջները չկատարելու համար առաջարկվում է սահմանել տուգանք՝ նվազագույն աշխատավարձի քսանապատիկի չափով և 1 տուգանային միավոր։

Նախագծերի ընդունմամբ ակնկալվում է նպաստել ճանապարհային երթևեկության անվտանգության բարձրացմանը, կանխել խցանումների առաջացումը և ապահովել երթևեկության բնականոն հոսքը։