Ընտրական իրավունքը խոչընդոտելու գործով ՀԷՑ-ի նախկին պաշտոնյան տնային կալանքի տակ է․ պահանջել են քվեարկել «Ուժեղ Հայաստանի» օգտին

ՀՀ քննչական կոմիտեի Շիրակի մարզային քննչական վարչությունում քննվող քրեական վարույթի նախաքննության ընթացքում առերևույթ փաստական տվյալներ են ձեռք բերվել ընտրական իրավունքի ազատ իրականացումը խոչընդոտելու նախապատրաստության վերաբերյալ։

Քննչական կոմիտեի փոխանցմամբ՝ Ս․Գ․-ն, որը նախկինում զբաղեցրել է «Հայաստանի էլեկտրական ցանցեր» ՓԲԸ-ի էլեկտրացանցի տնօրենի պաշտոնը և եղել ընկերության փականագործ Ռ․Բ․-ի ղեկավարը, Ա․Գ․-ի հետ, վերջինիս հետ Ռ․Բ․-ի ունեցած ընկերական հարաբերություններն օգտագործելով, նախնական համաձայնությամբ նախապատրաստել է վերջինիս ընտրական իրավունքի ազատ իրականացումը խոչընդոտելը։

Մասնավորապես՝ ըստ նախաքննության տվյալների՝ Ս․Գ․-ն, օգտագործելով նախկինում ունեցած իր ենթադրյալ ազդեցությունը, 2026 թվականի հունվարին Ռ․Բ․-ին հրավիրել է Շիրակի մարզի Մարալիկ բնակավայր և հանդիպել նրան։ Իսկ Ա․Գ․-ն 2025 թվականի սեպտեմբերին այցելել է Ռ․Բ․-ի բնակության վայր։

Քննչական կոմիտեի հաղորդմամբ՝ հանդիպումների ընթացքում նրանք Ռ․Բ․-ին հորդորել են 2026 թվականի հունիսի 7-ին նշանակված Ազգային ժողովի հերթական ընտրություններին քվեարկել «Ուժեղ Հայաստան» կուսակցության օգտին։

Քրեական վարույթի շրջանակում հսկող դատախազի որոշմամբ Ս․Գ․-ի և Ա․Գ․-ի նկատմամբ հանրային քրեական հետապնդում է հարուցվել Քրեական օրենսգրքի 43-210-րդ հոդվածի 2-րդ մասի 6-րդ կետով՝ մի խումբ անձանց կողմից նախնական համաձայնությամբ ընտրական իրավունքի իրականացումը խոչընդոտելու նախապատրաստության հատկանիշներով։

Ս․Գ․-ի նկատմամբ որպես խափանման միջոց կիրառվել են տնային կալանքը, գրավը և բացակայելու արգելքը։ Ա․Գ․-ին ձերբակալելու որոշում է կայացվել՝ նրան դատարան ներկայացնելու նպատակով։

Քրեական վարույթի նախաքննությունը շարունակվում է։ Նշված հանգամանքները ենթակա են քննության, և անձանց մեղավորությունը հաստատված կհամարվի միայն դատարանի՝ օրինական ուժի մեջ մտած դատավճռով։