Սուրենյանց․ Փաշինյանը փորձում է սեփական քաղաքականության հետևանքների պատասխանատվությունը բարդել Ռուսաստանի վրա

Քաղաքագետ Սուրեն Սուրենյանցը քննադատել է Նիկոլ Փաշինյանի՝ ԵԱՏՄ անդամ երկրների զեկույցի վերաբերյալ մեկնաբանությունները՝ դրանք որակելով որպես սեփական արտաքին քաղաքականության հետևանքների համար պատասխանատվությունից խուսափելու փորձ։

Սուրենյանցի գնահատմամբ՝ Փաշինյանը զեկույցը ներկայացնում է որպես Հայաստանի անկախության դեմ ուղղված դավադրություն՝ պնդելով, որ Հայաստանում ներքաղաքական անկայունություն հրահրելու երրորդ փորձ է նախապատրաստվում։

Քաղաքագետը նշել է, որ ԵԱՏՄ զեկույցի տնտեսական գնահատականների արժանահավատությունը և Հայաստանի նկատմամբ հնարավոր սահմանափակումների իրավաչափությունը պետք է դառնան առարկայական քննարկման թեմա։ Միաժամանակ, նրա կարծիքով, իշխանությունը հանրությանը չի ներկայացրել եվրոպական ինտեգրման իրատեսական ճանապարհային քարտեզ և հնարավոր տնտեսական կորուստները մեղմելու հստակ մեխանիզմներ։

Անդրադառնալով 2023 թվականի արցախյան իրադարձություններին՝ Սուրենյանցը նշել է, որ Ռուսաստանի պատասխանատվության հարցը պետք է քննարկվի հայ-ռուսական հարաբերություններում, սակայն Արցախի դեմ ռազմական գործողություններն իրականացրել է Ադրբեջանը, որն էլ, նրա գնահատմամբ, կրում է արցախահայության բռնի տեղահանման հիմնական պատասխանատվությունը։

Քաղաքագետը նաև կարծիք է հայտնել, որ Փաշինյանը կարող է սկսել արտահերթ խորհրդարանական ընտրությունների քաղաքական նախապատրաստությունը՝ դրա առանցքում դնելով հակառուսականությունը։ Նա հնարավոր ընտրական քարոզարշավը համեմատել է նախորդ ընտրությունների ընթացքում կիրառված «խաղաղություն կամ պատերազմ» երկընտրանքի հետ՝ ենթադրելով, որ այս անգամ այն կարող է փոխարինվել «անկախություն կամ Ռուսաստանի վերահսկողություն» հակադրությամբ։

Սուրենյանցի համոզմամբ՝ Հայաստանի անկախության պաշտպանությունը չպետք է նույնացվի գործող իշխանության պահպանման հետ, իսկ իշխանությունը պետք է պատասխանատվություն կրի իր քաղաքականության հետևանքների համար։