«Հավերժ մեր սրտերում»․ «Լիվերպուլը» գիրք է նվիրել Դիոգու Ժոտայի հիշատակին

Անգլիական «Լիվերպուլը» հայտարարել է թիմի նախկին հարձակվող Դիոգու Ժոտայի կյանքին, ֆուտբոլային կարիերային և թողած ժառանգությանը նվիրված կենսագրական գրքի հրատարակման մասին։ Գիրքը կրում է «Հավերժ մեր սրտերում» (Forever in our Hearts) խորագիրը։

Գրքի հեղինակը պորտուգալացի գրող և նախկին պրոֆեսիոնալ ֆուտբոլիստ Ժոզե Դելգադոն է։ Աշխատությունն անդրադառնում է Ժոտայի անցած ուղուն՝ Պորտուգալիայում ֆուտբոլային առաջին քայլերից մինչև «Լիվերպուլի» առանցքային խաղացողներից մեկը դառնալը։

Գրքում ներկայացված են ֆուտբոլիստի կարիերայի կարևորագույն ձեռքբերումները, այդ թվում՝ Անգլիայի Պրեմիեր լիգայում «Լիվերպուլի» հետ նվաճած չեմպիոնական տիտղոսը և Պորտուգալիայի հավաքականի կազմում Ազգերի լիգայի գավաթը նվաճելը։

Կենսագրականը հիմնված է ավելի քան 90 մարդկանց հետ անցկացված հարցազրույցների վրա։ Ֆուտբոլիստի մասին իրենց հիշողություններով կիսվել են նրա կինը՝ Ռուտեն, ծնողները՝ Իզաբելն ու Ժոակիմը, «Լիվերպուլի» նախկին գլխավոր մարզիչ Յուրգեն Կլոպը, ինչպես նաև թիմակիցներն ու ընկերները։

Գրքում ներկայացված է ոչ միայն Ժոտայի ֆուտբոլային տաղանդն ու նպատակասլացությունը, այլև նրա մարդկային հատկանիշները, համեստությունն ու մտերիմների հետ հարաբերությունները։ Առանձնահատուկ ուշադրություն է դարձվել նրա և կրտսեր եղբոր՝ Անդրեի միջև եղած կապին, ինչպես նաև մանկության սիրո՝ Ռուտեի հետ ընտանիք կազմելու պատմությանը։

Հիշեցնենք, որ Դիոգու Ժոտան և նրա եղբայրը՝ պորտուգալական «Պենաֆիել» ակումբի ֆուտբոլիստ Անդրե Սիլվան, զոհվել են 2025 թվականի հուլիսի 3-ին՝ Իսպանիայի Սամորա նահանգում տեղի ունեցած ավտովթարի հետևանքով։ Նրանց մեքենան՝ Lamborghini մակնիշի ավտոմեքենան, վթարի էր ենթարկվել A-52 մայրուղու 65-րդ կիլոմետրի հատվածում։

Գրքի հեղինակ Ժոզե Դելգադոյի խոսքով՝ աշխատությունը ստեղծվել է ֆուտբոլիստի հիշատակը վառ պահելու և նրա պատմությունը հոգատարությամբ ու հարգանքով ներկայացնելու նպատակով։ Նա ընդգծել է նաև Ժոտայի մտերիմների աջակցությունն ու երկու եղբայրների հանդեպ նրանց սերը։

«Հավերժ մեր սրտերում» գիրքն արդեն հասանելի է «Լիվերպուլի» պաշտոնական խանութներում և առցանց հարթակներում։ Վաճառքից ստացված ամբողջ հասույթը կուղղվի «Լիվերպուլի» բարեգործական հիմնադրամին՝ Ժոտայի անունը կրող մանկապատանեկան ֆուտբոլի զարգացման ծրագիրը ֆինանսավորելու համար։