Եվս երկու դատական որոշում՝ հօգուտ Մայր Աթոռի․ հոգևորականների կարգալուծության հարցը դատարանի իրավասությունից դուրս է

Փաստաբան Արա Զոհրաբյանը հայտնում է, որ ՀՀ Արմավիրի մարզի առաջին ատյանի ընդհանուր իրավասության դատարանի դատավորներ Ս. Աբովյանը և Հ. Մելքոնյանը կարճել են Արագածոտնի թեմի նախկին քահանաներ Ստեփան Ասատրյանի (նախկին Տեր Արամ) և Արամայիս Թախմազյանի (նախկին Տեր Թադե) հայցերով հարուցված քաղաքացիական գործերի վարույթները։

Նախկին քահանաները դատարանից պահանջել էին անվավեր ճանաչել Ամենայն Հայոց Կաթողիկոս Գարեգին Երկրորդի՝ իրենց կարգալույծ հռչակելու վերաբերյալ Հայրապետական տնօրինությունները և վերականգնել իրենց նախկին պաշտոններում։

Ըստ Զոհրաբյանի՝ երկու գործերով էլ դատարաններն ընդունել են Մայր Աթոռ Սուրբ Էջմիածնի իրավական դիրքորոշումը՝ արձանագրելով, որ հոգևորականին կարգալույծ հռչակելու հարցերը կարգավորվում են Եկեղեցու ներքին՝ կանոնական իրավունքով և ենթակա չեն քաղաքացիական դատավարության կարգով քննության։

Դատարանները նաև արձանագրել են, որ հոգևոր ծառայությունը չի կարող ինքնաբերաբար նույնացվել աշխատանքային հարաբերությունների հետ, իսկ Հայ Առաքելական Եկեղեցու ներքին կյանքը պաշտպանված է պետական միջամտությունից։

Որոշումներով նախատեսվել է նաև վերացնել հայցի ապահովման նախկին միջոցները, որոնցով Մայր Աթոռին պարտավորեցրել էին ապահովել նախկին քահանաների պաշտոնավարումը։

Զոհրաբյանի գնահատմամբ՝ այս որոշումները կարևոր նշանակություն ունեն Հայ Առաքելական Սուրբ Եկեղեցու ինքնավարության և նվիրապետական կառավարման սահմանադրական երաշխիքների պաշտպանության տեսանկյունից։

Նա ընդգծել է, որ պետության և Եկեղեցու անջատվածությունը ենթադրում է, որ պետական մարմինները, այդ թվում՝ դատարանները, չեն կարող ստանձնել եկեղեցական իշխանության գործառույթներ կամ աշխարհիկ իրավակարգավորումներով որոշել հոգևորականների կանոնական կարգավիճակը։

Միևնույն ժամանակ, փաստաբանի խոսքով, եկեղեցական ներքին հարցերը պետք է լուծվեն Եկեղեցու կանոններով և դրանցով նախատեսված ընթացակարգերի պահպանմամբ։

«Եկեղեցու ինքնավարության պաշտպանությունը նաև կրոնի ազատության և իրավական պետության սկզբունքների պաշտպանությունն է»,- գրել է Արա Զոհրաբյանը։