Իտալացի քահանան միջնամատ է ցույց տվել Միլանում անկարգությունների մասնակիցներին

Իտալացի 65-ամյա քահանա Ջաննիկոլա Մարիա Սիմոնեն հայտնվել է ուշադրության կենտրոնում այն բանից հետո, երբ Միլանում փողոցային անկարգությունների մասնակիցներից մեկին միջնամատ է ցույց տվել։ Միջադեպը տեղի է ունեցել հոկտեմբերի 17-ին՝ Սանտ-Ալեքսանդրո եկեղեցու մոտ։

Քահանան կանգնած է եղել եկեղեցու մուտքի մոտ, երբ նրա կողքով դիմակներով երիտասարդների մի խումբ է վազել։ Նրանցից մեկը քահանային միջնամատ է ցույց տվել, ինչին Սիմոնեն պատասխանել է նույն ժեստով։ Տեսանյութն արագ տարածվել է համացանցում, և որոշ օգտատերեր նույնիսկ կասկածել են, թե այն կարող է արհեստական բանականության միջոցով ստեղծված լինել։

Իտալական Corriere della Sera թերթի հետ զրույցում քահանան հաստատել է տեսանյութի իսկությունը՝ ընդգծելով, որ իր նպատակը վեճ հրահրելը կամ որևէ մեկի նկատմամբ ագրեսիա դրսևորելը չի եղել։

«Երբ այդ երիտասարդներն անցնում էին կողքովս, նրանցից մեկն ինձ միջնամատ ցույց տվեց։ Նրանք երեխաներ են, ուստի ես չզարմացա։ Ես պատասխանեցի նույն կերպ, բայց առանց որևէ ագրեսիվ մտադրության կամ հետագա զայրույթ հրահրելու ցանկության», — ասել է Սիմոնեն։

Նրա խոսքով՝ ինքը հետևել է հարևանությամբ տեղի ունեցող իրադարձություններին և, նկատելով, որ անկարգությունների մասնակիցները շարժվում են դեպի եկեղեցի ու ցրվում հարակից փողոցներով, որոշել է փակել տաճարը։ Քահանան եկեղեցում ապաստան է տվել զբոսաշրջիկներին և անցորդներին, որոնք փորձում էին փրկվել բռնությունից։ Նրանք այնտեղ մնացել են մինչև իրավիճակի հանդարտվելը։

Սիմոնեն նշել է, որ իր արարքի համար ապաշխարելու պատճառ չի տեսնում, քանի որ որևէ մեկին վնաս չի պատճառել։

«Եթե ես որևէ մեկին հարվածած լինեի, այդ դեպքում՝ այո։ Բայց ես երբեք ոչ մեկի վրա ձեռք չեմ բարձրացրել, նույնիսկ ամենադժվար պահերին», — նշել է քահանան։

Ավելի ուշ նա զրուցել է անկարգությունների որոշ մասնակիցների հետ։ Քահանայի խոսքով՝ նրանցից մեկն ընդունել է, որ հրապարակ էր եկել պարզապես այն պատճառով, որ մյուսներն էլ էին այնտեղ գնում։

Անկարգություններ են տեղի ունեցել Միլանում և Հյուսիսային Իտալիայի այլ քաղաքներում։ Դրանց մասնակիցները թալանել են խանութներ, վնասել շենքեր և հարձակվել ոստիկանների վրա։ Միլանում սկզբնական շրջանում բողոքի ցույցերը կապված են եղել կյանքի թանկացման և հանրային ծառայությունների ոլորտի խնդիրների հետ, սակայն հետագայում իրավիճակը վերածվել է բռնության։

Իտալիայի վարչապետ Ջորջիա Մելոնին և պաշտպանության նախարար Գուիդո Կրոզետոն կատարվածի պատասխանատվությունը վերագրել են անկարգությունների կազմակերպիչներին։ Կրոզետոն տեղի ունեցողը բնութագրել է որպես «հիբրիդային պատերազմի» դրսևորում՝ նշելով, որ պետությունների դեմ կարող են օգտագործվել նաև ոչ ավանդական միջոցներ, այդ թվում՝ TikTok-ը, սոցիալական ցանցերն ու YouTube-ը։