Գերմանիան «ինտենսիվ լրտեսության» թիրախում է․ Մերցը՝ ռուսական հետախուզության մասին

Գերմանիայի կանցլեր Ֆրիդրիխ Մերցը հայտարարել է, որ երկիրը գտնվում է «ինտենսիվ լրտեսության» թիրախում, իսկ ռուսական հետախուզական ծառայությունների ակտիվությունը շարունակում է բարձր մնալ. գրում է BBC News-ը։

Հայտարարությունը հնչել է այն բանից հետո, երբ Գերմանիայում ռուսական հետախուզության համար լրտեսություն կատարելու կասկածանքով ձերբակալվել է Ուկրաինայի քաղաքացի Վադիմ Յ.-ն։

Գերմանիայի դատախազության տվյալներով՝ կասկածյալը, առնվազն 2025 թվականի հուլիսից սկսած, միջնորդի միջոցով կապ է ունեցել ռուսական հետախուզության հետ։ Նա, ենթադրաբար, հավաքել է Գերմանիայի ռազմական ոլորտին վերաբերող տեղեկություններ, այդ թվում՝ զրահատեխնիկայի, զինամթերքի և պայթուցիկ նյութերի արտադրության մասին։

Ձերբակալվածը պետք է ուրբաթ օրը ներկայանար քննիչ դատավորին։

Գերմանիայում այս տարի արձանագրվել են նաև օտարերկրյա պետությունների օգտին լրտեսության այլ ենթադրյալ դեպքեր։ Դրանց թվում են նախկին գերմանացի հետախուզական պաշտոնյայի և Գերմանիայի արտաքին հետախուզական ծառայության նախկին աշխատակցի հետ կապված գործերը։

Բեռլինը Ռուսաստանին մեղադրել է նաև սեպտեմբերին Լայպցիգ-Հալլե օդանավակայանի ուղղությամբ պայթուցիկով սարքավորված անօդաչու թռչող սարք ուղարկելու մեջ։ Մոսկվան հերքել է մեղադրանքները, իսկ Ռուսաստանի նախագահ Վլադիմիր Պուտինը Գերմանիային մեղադրել է ապացույցներ կեղծելու մեջ։