Ռուսաստանից 40 հազար տոննա դիզվառելիք է ուղևորվում ԱՄՆ՝ 2022-ից ի վեր առաջին անգամ

Ռուսական դիզվառելիքի առաջին խմբաքանակը՝ ԱՄՆ նախագահ Դոնալդ Թրամփի և Ռուսաստանի միջև ձեռք բերված պայմանավորվածությունից հետո, լցանավով ուղևորվում է Նյու Յորք։ Այս մասին վկայում են նավագնացության տվյալները, հայտնում է Reuters-ը։

LSEG-ի տվյալներով՝ Մալթայի դրոշի ներքո նավարկող «Agioi Fanendes» լցանավը հոկտեմբերի 22-ին Ռուսաստանի Պրիմորսկ նավահանգստում բեռնել է 40 հազար տոննա ծծմբի չափազանց ցածր պարունակությամբ դիզվառելիք։ Սպասվում է, որ այն ԱՄՆ կհասնի նոյեմբերի 7-ին։

Գնորդի և վաճառողի ինքնությունը դեռ հայտնի չէ։ Սա կլինի ռուսական նավթամթերքի առաջին ներմուծումը ԱՄՆ՝ 2022 թվականին նախագահ Ջո Բայդենի վարչակազմի սահմանած արգելքից ի վեր։

Թրամփը հոկտեմբերի 9-ին հայտարարել էր, որ Ռուսաստանը ԱՄՆ և համաշխարհային շուկաներ անմիջապես կարտահանի 300 հազար տոննա դիզվառելիք՝ մոտ 2,25 միլիոն բարել։ Դրան կհաջորդի ևս 500 հազար տոննայի արտահանումը նոյեմբերին, այնուհետև՝ 1 միլիոն տոննայի։

Կրեմլի խոսնակ Դմիտրի Պեսկովը ուրբաթ հաստատել է, որ պայմանավորվածության շրջանակում առաջին նավն արդեն մեկնել է, սակայն չի հստակեցրել՝ այն ուղևորվում է ԱՄՆ, թե այլ շուկա։

Համաձայնությունը նախատեսում է նաև, որ Ռուսաստանը կվերացնի դիզվառելիքի արտահանման ինքնուրույն սահմանած արգելքը։ Ուկրաինայի դեմ պատերազմի պատճառով Եվրամիության՝ 2023 թվականի փետրվարին ռուսական նավթամթերքի ներմուծման ամբողջական էմբարգո սահմանելուց հետո Ռուսաստանն իր դիզվառելիքի հիմնական մասը արտահանում էր Թուրքիա, Բրազիլիա և աֆրիկյան երկրներ։

Ռուսաստանի փոխվարչապետ Ալեքսանդր Նովակը հայտարարել է, որ ռուսական ընկերությունները ԱՄՆ լրացուցիչ մատակարարումներ կիրականացնեն՝ երկու երկրների ընկերությունների միջև անհրաժեշտ պայմանագրերի կնքումից հետո։ Նրա խոսքով՝ Ռուսաստանը նախատեսում է մինչև տարեվերջ դիզվառելիքի արտահանումը հասցնել ամսական 3-3,5 միլիոն տոննայի։