Հրդեհ է բռնկվել Հիտլերի նախկին նստավայրում՝ «Արծվի բնում»

Գերմանիայի Բավարիա նահանգում գտնվող Ադոլֆ Հիտլերի նախկին հանգստավայրում՝ «Արծվի բնում», հրդեհ է բռնկվել։ BBC News-ի հաղորդմամբ՝ ոստիկանությունը ձերբակալել է կասկածյալի և պարզում է՝ արդյոք նա առնչություն ունի հրդեհի հետ։

Ուրբաթ՝ տեղական ժամանակով ժամը 21։15-ին, Տրաունշտայն քաղաքի դիսպետչերական ծառայությունը հրդեհի մասին ահազանգ է ստացել։ Դեպքի վայր ժամանած հրշեջները շենքը հայտնաբերել են կրակի մեջ։ Հրդեհաշիջման աշխատանքները բարդացել են համալիրի դժվարամատչելի տեղակայման պատճառով։

Ոստիկանության տվյալներով՝ հրդեհը շարունակվել է մինչև շաբաթ վաղ առավոտ։ Միջադեպի հետևանքները վերացնելու աշխատանքներին մասնակցել է արտակարգ ծառայությունների շուրջ 200 աշխատակից։ Վիրավորների մասին տեղեկություններ չեն հաղորդվել։

«Արծվի բույնը» գտնվում է Բավարական Ալպերում՝ Բերխտեսգադեն քաղաքի վերևում։ Համալիրի շինարարությունն ավարտվել է 1938 թվականին։ Հիտլերն այն օգտագործել է որպես հանգստավայր և քաղաքական հանդիպումների վայր։ Մասնավորապես, 1941 թվականին այնտեղ հանդիպումներ են անցկացվել զինվորական հրամանատարների հետ՝ Խորհրդային Միության վրա հարձակման նախապատրաստական աշխատանքների ժամանակ։

Նացիստական քարոզչությունն օգտագործել է նաև շրջակա ալպյան բնապատկերները՝ Հիտլերին ներկայացնելով որպես կենդանիների և բնության սիրահար։

Երկրորդ համաշխարհային պատերազմում նացիստական Գերմանիայի պարտությունից հետո շենքը չի ավերվել։ Հետագայում այն դարձել է զբոսաշրջային հայտնի վայր, որտեղ այժմ գործում է լեռնային հյուրանոց։ Համալիրի պաշտոնական կայքում այն ներկայացվում է նաև որպես նացիստական բռնապետության անմարդկայնության մասին հիշեցում։

Հիտլերի գլխավորած նացիստական ռեժիմը Երկրորդ համաշխարհային պատերազմի ընթացքում պատասխանատու էր տասնյակ միլիոնավոր մարդկանց մահվան, այդ թվում՝ եվրոպացի հրեաների համակարգված զանգվածային ոչնչացման համար։