Թրամփը փորձում է նվազեցնել վառելիքի գները․ ռուսական դիզվառելիքով տանկերը շարժվում է ԱՄՆ

Մալթայի դրոշի ներքո նավարկող Agioi Fanendes տանկերը, որը ռուսական դիզվառելիք է տեղափոխում, ուղևորվում է դեպի Նյու Յորք։ Սա կարող է լինել 2022 թվականից ի վեր ռուսական նավթամթերքի առաջին մատակարարումը ԱՄՆ։

Kpler-ի տվյալներով՝ նավը Պրիմորսկի նավահանգստում բեռնել է գրեթե 300 հազար բարել ռուսական դիզվառելիք։ LSEG-ի նավերի տեղաշարժին հետևող համակարգի տվյալներով՝ տանկերի բեռնատարողության մեջ կա 40 հազար տոննա ծծմբի ցածր պարունակությամբ դիզվառելիք։

Հոկտեմբերի 22-ի լույս 23-ի գիշերը Պրիմորսկից դուրս եկած տանկերը ուրբաթ օրը գտնվում էր Հելսինկիի ափերի մոտ։ Նավի սպասվող ժամանումը ԱՄՆ-ի արևելյան ափ նախատեսված է նոյեմբերի 7-ին՝ ԱՄՆ-ի միջանկյալ ընտրություններից չորս օր անց։

Գնորդի և վաճառողի ինքնությունը դեռ հայտնի չէ։ Reuters-ի փոխանցմամբ՝ եթե մատակարարումը հաստատվի, դա կլինի 2022 թվականից ի վեր ռուսական նավթի կամ նավթամթերքի առաջին առաքումը ԱՄՆ։ Այդ տարի ԱՄՆ նախագահ Ջո Բայդենն արգելել էր ռուսական էներգակիրների ներմուծումը։

Ռուսական լրատվամիջոցները, հղում անելով փոխվարչապետ Ալեքսանդր Նովակին, ավելի վաղ հայտնել էին, որ ռուսական դիզվառելիքով առաջին տանկերը ԱՄՆ պետք է մեկներ հինգշաբթի օրը։ Նովակի խոսքով՝ հետագայում մատակարարումները կշարունակվեն, երբ ռուսական և ամերիկյան ընկերությունները համապատասխան պայմանագրեր կնքեն։

Հոկտեմբերի 9-ին ԱՄՆ նախագահ Դոնալդ Թրամփը հայտարարել էր Վաշինգտոնի և Մոսկվայի միջև ռուսական դիզվառելիքի մատակարարումների շուրջ համաձայնության մասին։ Համաձայնությունը ենթադրում է ռուսական դիզվառելիքի մատակարարում ԱՄՆ և համաշխարհային շուկաներ՝ ռուսական դիզվառելիքի նկատմամբ ամերիկյան պատժամիջոցների ժամանակավոր մեղմացման պայմաններում։ Իր հերթին՝ Ռուսաստանը համաձայնել է վերացնել դիզվառելիքի արտահանման սեփական արգելքը։

Թրամփը հայտարարել էր, որ Ռուսաստանը անմիջապես կմատակարարի 300 հազար տոննա դիզվառելիք, նոյեմբերին՝ ևս 500 հազար տոննա, իսկ դրանից անմիջապես հետո՝ մեկ միլիոն տոննա։

Այս քայլը դիտարկվում է որպես ամերիկացի սպառողների համար վառելիքի գները նվազեցնելու փորձ՝ միջանկյալ ընտրություններից առաջ։ Այն քննադատության է արժանացել Ուկրաինայի և նրա դաշնակիցների, այդ թվում՝ Հանրապետական կուսակցության որոշ ներկայացուցիչների կողմից։

2023 թվականի փետրվարին Եվրամիության՝ ռուսական նավթամթերքի նկատմամբ սահմանած էմբարգոյից հետո Ռուսաստանը դիզվառելիքի արտահանումը հիմնականում ուղղել է դեպի Բրազիլիա, Թուրքիա և աֆրիկյան երկրներ։