Մեգան Մարքլը հայտնել է՝ ինչու է հեռու պահում հորը երեխաներից

Լոնդոնի Մետրոպոլիտեն ոստիկանությունը հաստատել է, որ 2019 թվականի հունվարին նամակ է ստացել Սասեքսի դքսուհի Մեգան Մարքլի հոր՝ Թոմաս Մարքլի վերաբերյալ մի շարք մեղադրանքներով։ Ոստիկանությունը տեղեկությունները փոխանցել է արքայազն Հարիի և Մեգան Մարքլի գրասենյակին, սակայն չի հաղորդել այլ իրավապահ մարմիններին։

Ինչպես հայտնում է BBC-ն, ուրբաթ օրը տեղեկություններ էին տարածվել, որ Թոմաս Մարքլի՝ Ֆիլիպիններում նախկին բնակության վայրում հայտնաբերվել են երեխաների նկատմամբ սեռական բռնության պատկերներ։ 82-ամյա Թոմաս Մարքլը, որը բնակվում է ԱՄՆ-ում, հերքում է նման պատկերներ ունենալու մասին պնդումները։

Դրանից հետո Մեգան Մարքլը հայտարարություն էր տարածել՝ նշելով, որ 2018 թվականին տեղեկացվել է իր օտարացած հոր վերաբերյալ անհանգստացնող մեղադրանքների մասին։

Մեղադրանքների մասին առաջինը գրել էր The Sun պարբերականը, որն ավելի ուշ հայտնել էր, որ նամակում Թոմաս Մարքլին ուղղակիորեն մեղադրում էին երեխաների նկատմամբ սեռական բռնության մեջ։

Լոնդոնի ոստիկանության հայտարարության համաձայն՝ նամակն ուղարկվել էր ոստիկանության պաշտպանության ստորաբաժանում՝ Սասեքսի դքսուհու անվտանգության վերաբերյալ մտահոգությունների շրջանակում։

«Նամակն ուսումնասիրվել է, և որոշում է կայացվել այն փոխանցել Սասեքսի դուքսի և դքսուհու գրասենյակին՝ նրանց տեղեկացնելու նպատակով։ Նամակում ներկայացված մեղադրանքների մանրամասները չեն փոխանցվել այլ իրավապահ մարմինների»,- ասվում է ոստիկանության հայտարարության մեջ։

Ոստիկանությունը ներկայում վերանայում է 2019 թվականին այս հարցի քննության ընթացքը և դիտարկում՝ արդյոք անհրաժեշտ է նյութերն ուղարկել Ոստիկանության վարքագծի անկախ վերահսկողության գրասենյակ (IOPC)՝ իր գործողությունները գնահատելու համար։

Թոմաս Մարքլը նախորդ տարի տեղափոխվել էր Ֆիլիպիններ՝ մի քանի անգամ կաթված ստանալուց հետո։ Հաղորդվում է, որ այժմ նա գտնվում է Ֆլորիդայի վերականգնողական կենտրոններից մեկում, որտեղ սովորում է կրկին քայլել։ 2025 թվականին նրա ոտքերից մեկն անդամահատվել էր։

Ուրբաթ օրը տարածած հայտարարության մեջ Մեգան Մարքլը նշել էր, որ երբ տեղեկացվել է հոր դեմ մեղադրանքների մասին, իրեն վստահեցրել են, որ դրանք քննվում են։ Նա նաև հույս էր հայտնել, որ հանրությունը կհասկանա՝ ինչու է հեռու մնում հորից և թույլ չի տալիս նրան շփվել իր երեխաների հետ։