Հիտլերի նախկին լեռնային նստավայրում հրդեհ է բռնկվել, մեկ անձ է ձերբակալվել

Գերմանիայի հարավում՝ Բավարիա երկրամասում, հրդեհ է բռնկվել Ադոլֆ Հիտլերի նախկին լեռնային նստավայրում, որը հայտնի է «Արծվի բույն» (Eagle’s Nest) անվամբ։ Ոստիկանությունը դեպքի վայրում ձերբակալել է կասկածյալի։

Ինչպես հայտնում է BBC-ն, Տրաունշտայնի արտակարգ ծառայությունները հրդեհի ահազանգ են ստացել ուրբաթ՝ տեղական ժամանակով ժամը 21։15-ին։ Հրշեջները ժամանել են և շինությունը գտել ամբողջությամբ կրակի մեջ։

Տեղանքի բարդ ռելիեֆը խոչընդոտել է կրակը մարելու աշխատանքներին։ Ոստիկանության տվյալներով՝ շաբաթ առավոտյան հրդեհը դեռ շարունակվում էր։ Դեպքի վայրում ներգրավվել է շուրջ 200 փրկարար և արտակարգ ծառայության աշխատակից։ Տուժածների մասին տեղեկություններ չեն հաղորդվել։

Բերխտեսգադեն քաղաքի վերևում գտնվող այս շինությունը Երկրորդ համաշխարհային պատերազմի տարիներին նացիստական առաջնորդի և նրա շրջապատի օգտագործած կառույցներից մեկն էր։ Հիտլերն ու նացիստական բարձրաստիճան պաշտոնյաները մոտակայքում գտնվող Բերգհոֆ նստավայրում ծրագրել էին 1941 թվականին Խորհրդային Միության վրա հարձակումը։ Ամբողջ տարածքը համարվում էր Հիտլերի գլխավոր շտաբային կենտրոններից մեկը։

Նացիստական ռեժիմն այդ շրջանն օգտագործել է նաև քարոզչական ֆիլմերում՝ Հիտլերին ներկայացնելով որպես կենդանիների և բնության սիրահար։

Ոստիկանությունը քրեական վարույթ է սկսել՝ պարզելու, թե արդյոք ձերբակալված անձը կապ ունի հրդեհի հետ։

«Արծվի բույնը» կառուցվել է նացիստների կողմից 1938 թվականին՝ ծովի մակարդակից շուրջ 1800 մետր բարձրության վրա։ Այն չի ոչնչացվել 1945 թվականին նացիստական Գերմանիայի պարտությունից հետո։ Հետագայում դարձել է զբոսաշրջային հայտնի վայր, որտեղ այժմ գործում է լեռնային պանդոկ։

Շինության պաշտոնական կայքում այն բնութագրվում է որպես «անմարդկային նացիստական բռնապետության անդունդների մասին զգուշացնող հիշեցում»։

Երկրորդ համաշխարհային պատերազմի ընթացքում Հիտլերը և նրա հետևորդները պատասխանատու էին տասնյակ միլիոնավոր մարդկանց մահվան համար, այդ թվում՝ Եվրոպայի հրեաների զանգվածային սպանությունների։ Համակենտրոնացման ճամբարներ էին ուղարկվում նաև գեյերը, ռոմաները, հաշմանդամություն ունեցող անձինք և էթնիկ փոքրամասնությունների ներկայացուցիչներ։

Գերմանիայում և Վիեննայում շարունակվում է բանավեճը Հիտլերի հետ կապված պատմական շինությունների պահպանման, վերափոխման կամ քանդման շուրջ։ Մի մասը կարծում է, որ դրանք պետք է պահպանվեն պատմական հիշողության համար, մյուսները մտահոգություն են հայտնում, որ այդ վայրերը կարող են վերածվել նեոնացիստների և ծայրահեղ աջակողմյանների ուխտագնացության կենտրոնների։

Հունիսին Բեռլինի իշխանությունները հայտարարել էին Հիտլերի նախկին բունկերներից մեկը քանդելու և դրա տեղում բնակելի ու գրասենյակային շենքեր կառուցելու ծրագրի մասին։ Իսկ հուլիսին Ավստրիայի Բրաունաու ամ Ին քաղաքում վերանորոգվել էր այն տունը, որտեղ ծնվել էր Հիտլերը, և շենքը վերածվել էր ոստիկանական բաժանմունքի։