Միգրացիայից մինչև ինքնիշխանություն․ Մարին Լը Պենը ներկայացրել է «Ֆրանսիայի վերածննդի» ծրագիրը

Ֆրանսիական ծայրահեղ աջ «Ազգային միավորում» կուսակցության առաջնորդ Մարին Լը Պենը խոստացել է վերադարձնել Ֆրանսիային իր ուժը, ազդեցությունն ու անվտանգությունը՝ բացելով 2027 թվականի ընտրություններից առաջ իր նախագահական քարոզարշավը, հայտնում է Europe 1-ը։

Հոկտեմբերի 25-ին Օռլեանում ունեցած առաջին խոշոր նախընտրական ելույթի ընթացքում նա իր ծրագրի կենտրոնական թեմա է հայտարարել «Ֆրանսիայի վերածնունդը» և կոչ արել հրաժարվել անկումային տրամադրություններից։

Մոտ 8,5 հազար կողմնակիցների առաջ Լը Պենը հայտարարել է, որ երկիրը ապրում է ոչ թե իր պատմության ավարտը, այլ պատմական և տեխնոլոգիական փոփոխությունների շրջան։ Նրա կարծիքով, ներկայիս դարաշրջանը հիշեցնում է Վերածննդին նախորդած ժամանակը, և Ֆրանսիան կարող է կրկին մտնել մշակութային, տնտեսական և քաղաքական վերելքի փուլ։

«Ես ձեզ չեմ առաջարկում վերստեղծել նախկին Ֆրանսիան։ Ես առաջարկում եմ նախագծել և կառուցել ապագայի Ֆրանսիան», — հայտարարել է քաղաքական գործիչը՝ ընդգծելով, որ վերածնունդը չպետք է նշանակի կտրուկ խզում անցյալի հետ կամ կործանարար հեղափոխություն։

Լը Պենը խոստացել է խստացնել միգրացիոն քաղաքականությունը, ուժեղացնել պայքարը հանցավորության և քրեական խմբավորումների դեմ, ինչպես նաև վերականգնել ազգային ինքնիշխանությունը։ Նա հանդես է եկել օտարերկրյա հանցագործների ավտոմատ արտաքսման օգտին և հայտարարել է քաղաքացիների անվտանգությունն ապահովելու ու երկրում կարգուկանոնը վերականգնելու անհրաժեշտության մասին։

Քաղաքական գործիչը նաև կոչ է արել վերադառնալ ֆրանսիական մշակույթի ավանդույթներին և ընդգծել է, որ պետությունը պետք է պաշտպանի քաղաքացիներին բռնությունից և անպատժելիությունից։ Միջազգային քաղաքականության մեջ նա խոստացել է Ֆրանսիան դարձնել «խաղաղության երկիր» և չուղարկել երիտասարդ ֆրանսիացիներին կռվելու այն հակամարտություններում, որոնք չեն առնչվում երկրի շահերին։

Լը Պենը, որին հարցումները անվանում են նախագահական մրցավազքի ֆավորիտներից մեկը, իր ծրագիրը ներկայացրել է որպես ազգային միասնության նախագիծ։ Հաղթանակի դեպքում նա մտադիր է ձևավորել «ազգային միասնության» կառավարություն՝ իր կուսակցության առաջնորդ Ժորդան Բարդելայի գլխավորությամբ։

Ֆրանսիայում նախագահական ընտրությունները պետք է անցկացվեն 2027 թվականի գարնանը։ Լը Պենը չորրորդ անգամ հավակնում է պետության ղեկավարի պաշտոնին։ Նրա քարոզարշավը բարդացնում է Եվրախորհրդարանի միջոցների հափշտակության գործով մեղադրական դատավճիռը, որը նա բողոքարկում է։ Ընտրվելու դեպքում ֆրանսիական օրենսդրությանը առաջնահերթություն տալու և ԵՄ ինստիտուտների ազդեցությունը սահմանափակելու նրա կուրսը կարող է հանգեցնել Բրյուսելի հետ լուրջ տարաձայնությունների։