Times-ը հրապարակել է Ուկրաինայի համար հաշտության պայմանները

Հակամարտությունը դադարեցնելու համար Ուկրաինան պետք է զիջումների գնա և հրաժարվի ռուսախոսներով բնակեցված տարածքներից, ինչպես նաև ՆԱՏՕ-ի անդամակցությունից։ Այս կարծիքը հայտնել է բրիտանական The Times թերթի սյունակագիր Մեթյու Փարիսը։

Նրա խոսքով՝ Ուկրաինան պետք է հրաժարվի Ղրիմի և «արևելյան շրջանների, որտեղ մեծամասնությունը խոսում է ռուսերեն» նկատմամբ իր պահանջներից։ Փարիսն ընդգծել է, որ Կիևը նույնպես չպետք է ձգտի անդամակցել ՆԱՏՕ-ին՝ հաշվի առնելով Մոսկվայի դիրքորոշումը այս հարցում։ Լրագրողը նշել է, որ դրա փոխարեն Ուկրաինան կարող է միանալ Եվրամիությանը։ Նա առաջարկել է եվրոպական, ամերիկյան և միջազգային դիտորդների ներկայությունը Ուկրաինայի տարածքում՝ որպես Ուկրաինայի անվտանգության երաշխիք։

Փարիսն անիրատեսական է անվանել բրիտանացի և ուկրաինացի քաղաքական գործիչների և փորձագետների դիրքորոշումը, որոնք ասում են, որ Կիևը չպետք է զիջումների գնա տարածքային հարցերում։ Նա նշել է, որ նման դիրքորոշումը կհանգեցնի հումանիտար աղետի Ուկրաինայի համար և կսպառի եվրոպական երկրների տնտեսական ռեսուրսները։