Արտակարգ պատահար․ Երևանում «Deepal»-ը վրաերթի է ենթարկել տատ ու թոռան, ապա բախվել երկու կայանված մեքենայի

Հոկտեմբերի 26-ին՝ ժամը 13։40-ի սահմաններում, վրաերթ-ավտովթար է տեղի ունեցել Երևանում։

Երևանի բնակիչ՝ 48-ամյա Գուրգեն Գ․-ն, իր վարած «Deepal» մակնիշի ավտոմեքենայով Տիգրան Պետրոսյան փողոցում վրաերթի է ենթարկել ճանապարհը չթույլատրված հատվածով անցնող երկու հետիոտնի։

Դրանից հետո «Deepal»-ը բախվել է ճանապարհի թույլատրելի հատվածում կայանված «Mercedes» մակնիշի ավտոմեքենային, որն էլ առաջ ընթանալով բախվել է կայանված «Nissan Tiida»-ին։

Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը դեպքի վայրից չի հեռացել։ Ահազանգի համաձայն՝ ժամանել է շտապօգնության խումբ, և քաղաքացիների ու բժիշկների օգնությամբ վրաերթի ենթարկված երկու անձինք տեղափոխվել են «Արմենիա» բժշկական կենտրոն։

Դեպքի վայր են ժամանել ՆԳՆ ոստիկանության Պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկները, որոնք սահմանազատել են տարածքը։

Դեպքի մասին տեղեկությունը փոխանցվել է Քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին։ Դեպքի վայր է ժամանել քննչական խումբը։

Վրաերթ-վթարի փաստով նախաձեռնվել է քրեական վարույթ։ Քննությամբ պարզվում են դեպքի հանգամանքները, ինչպես նաև վրաերթի ենթարկվածների և վնասված ավտոմեքենաների սեփականատերերի ինքնությունը։

Քննիչի հանձնարարությամբ «Deepal»-ը տեղափոխվել է Պարեկային ծառայության Երևան քաղաքի գնդի պահպանվող հատուկ տարածք։

Ֆոտոլրագրողի տեղեկություններով՝ վրաերթի ենթարկվածները տատ ու թոռ են։