Աշտարակում 38-ամյա տղամարդը սպառնացել է բռնություն գործադրել շտապօգնության բժիշկների նկատմամբ

Հոկտեմբերի 20-ին արտառոց դեպք է տեղի ունեցել Արագածոտնի մարզի Աշտարակ քաղաքում։ 38-ամյա տղամարդը, ըստ հաղորդման, խոչընդոտել է շտապօգնության բուժաշխատողների մասնագիտական աշխատանքը, թույլ չի տվել իրեն զննել և բռնություն գործադրելու սպառնալիքներ է հնչեցրել նրանց հասցեին։

Ինչպես հայտնում է ֆոտոլրագրող Գագիկ Շամշյանը, ժամը 20։15-ի սահմաններում շտապօգնության բրիգադը ահազանգով մեկնել է Աշտարակի Խորենացի փողոցի հասցեներից մեկը։ Տեղում բուժաշխատողները հանդիպել են Արագածոտնի մարզի բնակիչ՝ 38-ամյա Արմեն Ս․-ին, որը, ըստ բժշկի հաղորդման, դրսևորել է ոչ ադեկվատ վարքագիծ և չի պատասխանել իրեն ուղղված հարցերին։

Տղամարդը թույլ չի տվել բուժաշխատողներին զննել իրեն, ապա ինքնակամ նստել է շտապօգնության ավտոմեքենայի՝ հիվանդների տեղափոխման համար չնախատեսված առջևի նստատեղին՝ պահանջելով իրեն տեղափոխել բժշկական կենտրոն։ Այդ ընթացքում նա, ըստ հաղորդման, սպառնացել է բուժաշխատողների նկատմամբ բռնություն գործադրել։

Դեպքի մասին տեղեկություն ստանալուց հետո ոստիկանության Աշտարակի բաժնի օպերատիվ խումբը մեկնել է նշված հասցե։ Ժամը 21։00-ի սահմաններում ոստիկանները տղամարդուն ձերբակալել և տեղափոխել են բաժին։

Դեպքի առթիվ կազմված փաստաթղթերը տղամարդու հետ միասին ներկայացվել են ՀՀ քննչական կոմիտեի Արագածոտնի մարզային քննչական վարչություն։ Դեպքի հանգամանքները պարզվում են։