Audi-ն ԱՄՆ-ում 4 միլիարդ դոլարով ավտոգործարան կկառուցի

Գերմանական Audi ավտոարտադրողը շուրջ 4 միլիարդ դոլար կներդնի ԱՄՆ Ջորջիա նահանգում իր առաջին սեփական ավտոգործարանի կառուցման համար։ Այս մասին հայտարարվել է հոկտեմբերի 24-ին՝ ԱՄՆ նախագահ Դոնալդ Թրամփի նախընտրական միջոցառման ժամանակ։

Նոր գործարանը կկառուցվի Փիչ շրջանում՝ Մեյքոն քաղաքի մոտ։ Նախատեսվում է տարեկան արտադրել մինչև 200 հազար ավտոմեքենա և ստեղծել շուրջ 4500 աշխատատեղ։ Շինարարական աշխատանքները կմեկնարկեն 2027 թվականին, իսկ սերիական արտադրությունը նախատեսվում է սկսել 2030-ականների սկզբին։ Ջորջիայի իշխանությունները որպես արտադրության ամբողջական ծավալին հասնելու նպատակային ժամկետ նշում են 2031 թվականը։

Գործարանում նախատեսվում է արտադրել խոշոր և բարձրակարգ ամենագնացներ, այդ թվում՝ Audi Q7, Q8 և Q9 մոդելները։ Ընկերության ղեկավար Գերնոտ Դյոլները նշել է, որ ԱՄՆ-ը համաշխարհային կարևորագույն պրեմիում ավտոմեքենաների շուկաներից է, որտեղ Audi-ն դեռ ամբողջությամբ չի իրացրել իր ներուժը։

ԱՄՆ-ում արտադրության տեղայնացումը թույլ կտա ընկերությանը նվազեցնել միջազգային մատակարարման շղթաներից կախվածությունը և խուսափել ներմուծման լրացուցիչ մաքսատուրքերի մի մասի ազդեցությունից։ Թրամփը ներդրումը ներկայացրել է որպես իր մաքսային քաղաքականության հաջողության օրինակ, որի նպատակներից մեկը օտարերկրյա ընկերություններին ԱՄՆ-ում արտադրություն հիմնելը խրախուսելն է։

Միաժամանակ այս որոշումը հարցեր է առաջացնում Գերմանիայում Volkswagen խմբի գործարանների ապագայի վերաբերյալ։ Audi-ն ընդգծում է, որ Գերմանիան և Եվրոպան կշարունակեն մնալ ընկերության արդյունաբերական գործունեության հիմքը, իսկ ամերիկյան նոր գործարանը կլրացնի գործող արտադրական հնարավորությունները։