Դիմակավորված անձինք Ավանում թալանել են բանկի վճարային տերմինալը․ գողացել են շուրջ 4 միլիոն դրամ

Հոկտեմբերի 25-ին գողության դեպք է տեղի ունեցել Երևանում։ Ավան վարչական շրջանում դիմակավորված երկու անձինք տեխնիկական միջոցների գործադրմամբ բացել են բանկերից մեկի մասնաճյուղում տեղադրված վճարային տերմինալը և գողացել դրամապահոցը, որում, ըստ նախնական տեղեկությունների, եղել է շուրջ 4 միլիոն դրամ։

Ինչպես հայտնում է ֆոտոլրագրող Գագիկ Շամշյանը, հոկտեմբերի 25-ին՝ ժամը 05։00-ի սահմաններում, ոստիկանության Ավանի բաժնում օպերատիվ տեղեկություններ են ստացվել Մարշալ Խուդյակովի փողոցում գործող բանկի մասնաճյուղից կատարված գողության վերաբերյալ։

Դեպքի վայր ժամանած ոստիկանները պարզել են, որ ժամը 04։30-ից մինչև 05։00-ն ընկած ժամանակահատվածում երկու դիմակավորված անձինք բացել են նշված հասցեում տեղադրված՝ ՍՊԸ-ներից մեկին պատկանող վճարային տերմինալը և այնտեղից հափշտակել դրամապահոցը։

Դեպքի մասին տեղեկությունը փոխանցվել է Քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին։ Փաստի առթիվ նախաձեռնվել է քրեական վարույթ։

Ոստիկանությունն ու քննչական մարմինները միջոցառումներ են իրականացնում հանցագործությունը կատարած անձանց ինքնությունը պարզելու, նրանց հայտնաբերելու և գողոնը վերադարձնելու ուղղությամբ։