«Ամբողջ աշխարհում սկսվել են տնտեսական ցնցումներ․ չքանդենք եղածը». Գագիկ Ծառուկյանը՝ ԵԱՏՄ զեկույցի մասին

Գագիկ Ծառուկյանը, անդրադառնալով Հայաստանի՝ Եվրասիական տնտեսական միությունից (ԵԱՏՄ) դուրս գալու կամ անդամակցությունը կասեցնելու հնարավոր տնտեսական հետևանքներին վերաբերող զեկույցին, կոչ է արել իրավիճակին մոտենալ զգուշավորությամբ և չվտանգել արդեն իսկ առկա տնտեսական հնարավորությունները։

Այս մասին նա գրել է իր ֆեյսբուքյան էջում՝ նշելով, որ հրապարակված զեկույցը շատերի մոտ լուրջ հարցեր և մտահոգություններ է առաջացրել։

Ծառուկյանի խոսքով՝ տնտեսական ցուցանիշների հետևում իրական մարդիկ են, իսկ հնարավոր անկումը և գների աճը կարող են հանգեցնել բազմաթիվ բիզնեսների փակման, սնանկացման, ինչպես նաև հազարավոր ընտանիքների բարեկեցության վատթարացման։

Նա ընդգծել է, որ Հայաստանի տնտեսական ապագային վերաբերող նման վերլուծությունները նախևառաջ պետք է իրականացվեն հենց Հայաստանում՝ ոլորտային մասնագետների և փորձագետների մասնակցությամբ։ Նրա կարծիքով՝ դա թույլ կտա ավելի իրատեսորեն գնահատել հնարավոր ռիսկերն ու սցենարները։

Ծառուկյանը նաև նշել է, որ ԵԱՏՄ-ում առկա հնարավորությունները կարելի է օգտագործել Հայաստանի տնտեսությունը զարգացնելու, նոր շուկաներ ներգրավելու և ներդրումներ ապահովելու համար՝ առանց գործող տնտեսական կապերը վտանգելու։

«Մեր բոլորի աչքի առաջ ամբողջ աշխարհում սկսվել են տնտեսական ցնցումներ։ Իմ գնահատականով՝ դրանք շարունակվելու են, որովհետև պատճառները խորքային են։ Այս պայմաններում փոքր Հայաստանի համար լրացուցիչ խոշոր ռիսկերը ուղղակի անթույլատրելի են։ Հիմա մենք պիտի շատ հանդարտ ու զուսպ քայլեր անենք, չքանդենք եղածը, այլ այն որպես հիմք վերցնելով՝ օգտվենք փոփոխվող աշխարհի բերած հնարավորություններից»,- գրել է Ծառուկյանը։