Քենիայում Էբոլայի 9 դեպք է հաստատվել․ իշխանությունները հույս ունեն երկու ամսում վերահսկել բռնկումը

Քենիայում Էբոլա վիրուսով վարակման 9 դեպք և երկու մահ է հաստատվել։ Չնայած իրավիճակը վերահսկելու ուղղությամբ իրականացվող միջոցառումներին՝ իշխանությունները շարունակում են զգոնություն պահպանել՝ հաշվի առնելով վարակի հետագա տարածման վտանգը. փոխանցում է BBC-ն։

Առաջին հիվանդի հետ շփում ունեցած 20 անձ արդեն դուրս է եկել կարանտինից։ Եվս 98 մարդ շարունակում է գտնվել մեկուսացման մեջ, և նրանց ազատ արձակումը նախատեսվում է հաջորդ շաբաթ։ Քենիայի իշխանությունները հույս ունեն, որ բռնկումը հնարավոր կլինի ավարտված հայտարարել երկու ամսից էլ շուտ, եթե նոր դեպքեր չարձանագրվեն։

Երկրի առողջապահության գլխավոր տնօրեն Պատրիկ Ամոթի խոսքով՝ բռնկումը պաշտոնապես ավարտված կհամարվի միայն այն բանից հետո, երբ վերջին հաստատված հիվանդի՝ Էբոլայի թեստերի երկու բացասական արդյունքից հետո անցնի 42 օր։ Նա ընդգծել է, որ մինչև այդ պահը զգոնությունը թուլացնել չի կարելի։

Վարակի տարածումը կանխելու նպատակով Քենիան ուժեղացրել է օդանավակայաններում և սահմանային անցակետերում հսկողությունը։ Բարձր ռիսկային համարվող 10 երկրից ժամանող ուղևորները պետք է լրացնեն թվային հսկողության ձևաթուղթ և ժամանելիս ներկայացնեն QR կոդ։ Երկրում նաև նախատեսվել են բուժման և մեկուսացման կենտրոններ, իսկ շուրջ 5000 բուժաշխատող վերապատրաստվել է Էբոլայի դեմ պայքարի համար։

Առողջապահության համաշխարհային կազմակերպության տվյալներով՝ առաջին դեպքի հաստատումից հետո իրականացվել է վարակակիրների հետ շփում ունեցած անձանց հետագծում։ Քենիայի իշխանությունները հայտնում են, որ մինչ այժմ հաստատված բոլոր դեպքերը կապված են առաջին հիվանդի հետ, և համայնքում վարակի տարածման ապացույցներ չկան։

Այնուամենայնիվ, մտահոգություններ կան բուժաշխատողների անվտանգության վերաբերյալ․ վարակվածների թվում են երեք բուժաշխատող և հիվանդանոցի մաքրող։ Քենիայի բժիշկների միությունը նաև մատնանշել է սահմանային անցակետերում և գլխավոր օդանավակայանում անձնակազմի պակասը։

Բռնկումն առաջացել է Էբոլայի՝ Բունդիբուգիո տեսակի վիրուսով, որի դեմ հաստատված պատվաստանյութ կամ բուժում դեռ չկա, թեև փորձարկումներ են իրականացվում։ Վարակը փոխանցվում է վարակված մարդու մարմնական հեղուկների, այդ թվում՝ արյան և փսխման հետ շփման միջոցով։

Քենիան այս պահին չի սահմանել ճանապարհորդության, առևտրի կամ հանրային հավաքների սահմանափակումներ և բացառել է համազգային կարանտինն ու ընդհանուր ճանապարհորդական արգելքը։ Միաժամանակ ԱՄՆ-ն իր քաղաքացիներին խորհուրդ է տվել վերանայել Քենիա մեկնելու ծրագրերը, իսկ տարածաշրջանի մի շարք երկրներ ուժեղացրել են առողջապահական հսկողությունը։

Առողջապահության ոլորտի ներկայացուցիչները կոչ են անում շարունակել ֆինանսավորել վարակակիրների հետ շփում ունեցած անձանց հետագծումը, սահմանային ստուգումները և բուժաշխատողների վերապատրաստումը։