Հնդկաստանը Շանհայի համագործակցության կազմակերպության բոլոր երկրներին հրավիրել է «Քաղաքակրթությունների երկխոսության» ֆորումին

Հնդկաստանը Շանհայի համագործակցության կազմակերպության (ՇՀԿ) բոլոր անդամներին և գործընկերներին հրավիրել է Քաղաքակրթությունների երկխոսության ֆորումին։ Այս մասին ճեպազրույցի ժամանակ հայտարարել է Հնդկաստանի արտաքին գործերի նախարարության խոսնակ Ռանդհիր Ջայսվալը՝ պատասխանելով Պակիստանի մասնակցության վերաբերյալ հարցին։

«Ըստ սահմանված պրակտիկայի՝ մենք հրավիրել ենք ՇՀԿ բոլոր անդամ պետությունների ներկայացուցիչներին, ինչպես նաև գործընկերներին և մեկ դիտորդ», - ասել է նա՝ հիշեցնելով, որ ֆորումը տեղի կունենա նոյեմբերի 20-22-ը Նյու Դելիում։

Միջոցառմանը, ինչպես սպասվում է, կմասնակցեն ՇՀԿ անդամ պետությունների մշակույթի նախարարները, ինչպես նաև երկխոսության գործընկեր և դիտորդ երկրները։ Այն կազմակերպվում է Հնդկաստանի մշակույթի և արտաքին գործերի նախարարությունների կողմից։ ՇՀԿ քաղաքակրթությունների երկխոսության ֆորում ստեղծելու նախաձեռնությունը ներկայացրել է Հնդկաստանի վարչապետ Նարենդրա Մոդին կազմակերպության 2025 թվականին Տյանցզինում կայացած գագաթնաժողովում։

Այն նպատակ ունի զարգացնել երկխոսությունը և ամրապնդել փոխըմբռնում ՇՀԿ երկրների միջև՝ հիմնվելով ընդհանուր մշակութային և քաղաքակրթական ժառանգության վրա։

Ավելի վաղ The Hindu-ն հայտնել էր, որ Հնդկաստանը, 2025 թվականին Պակիստանի հետ զինված հակամարտությունից ի վեր առաջին անգամ, հրավիրել է այդ երկրի ներկայացուցչին մասնակցելու ՇՀԿ քաղաքակրթությունների երկխոսության ֆորումին: Հնդկական կողմը հրավերը հղել է Պակիստանի ազգային ժառանգության և մշակույթի նախարար Աուրանգզեբ Խան Խիչիին: Թերթի տվյալներով՝ Իսլամաբադը դեռևս չի հաստատել, թե ով է գլխավորելու երկրի պատվիրակությունը ֆորումին: