Համբարձում Մաթևոսյանի անունով կեղծ օգտահաշիվներ են բացվել WhatsApp-ում և Telegram-ում

WhatsApp և Telegram հավելվածներում բացվել են Շրջակա միջավայրի նախարար Համբարձում Մաթևոսյանի անուն-ազգանունով կեղծ օգտահաշիվներ։ Այս մասին հայտնում են նախարարությունից։

Գերատեսչության հաղորդմամբ՝ այդ օգտահաշիվներից կարող են հաղորդագրություններ ուղարկվել՝ տարբեր տեղեկություններ կամ գործողություններ պահանջելու նպատակով։

Նախարարությունը քաղաքացիներին հորդորում է լինել զգոն, չպատասխանել նման հաղորդագրություններին և չտրամադրել անձնական կամ ծառայողական տեղեկություններ, այդ թվում՝ գաղտնաբառեր, կոդեր և բանկային տվյալներ։

Նաև խորհուրդ է տրվում չկատարել փոխանցումներ կամ այլ գործողություններ՝ նման պահանջների հիման վրա։ Անհրաժեշտության դեպքում քաղաքացիներին հորդորում են արգելափակել կեղծ օգտահաշիվները և հաղորդել դրանց մասին՝ որպես խարդախություն կամ սպամ։