Վարդան Ղուկասյանի գործով արդարացման վերդիկտ կա, բայց դատավճիռը դեռ չկա․ պաշտպան

Գյումրիի քաղաքապետ Վարդան Ղուկասյանի գործով այս պահին ուսումնասիրվում են գրավոր ապացույցները, այդ թվում՝ փաստաթղթերն ու գաղտնի օպերատիվ-հետախուզական միջոցառումների արդյունքները։ Այս մասին հոկտեմբերի 28-ին դատարանի բակում լրագրողների հետ զրույցում հայտնել է նրա պաշտպան Արամայիս Հայրապետյանը։

Փաստաբանի խոսքով՝ գործի նյութերում արձանագրությունների և ձայնագրությունների միջև հակասություններ կան։ Նա նշել է, որ որոշ դեպքերում արձանագրության մեջ արձանագրվածը չի համապատասխանում ձայնագրության մեջ լսվող խոսքին։

Հայրապետյանի խոսքով՝ ձայնագրություններում հնչում են նաև ՔՊ-ի հետ կապված անձանց անուններ, սակայն որոշ հատվածներ արձանագրություններում ներկայացված են որպես անհասկանալի։ Պաշտպանը հարց է բարձրացրել՝ արդյոք դրանք դիտավորյալ չեն հասկացվել, թե իսկապես անհասկանալի են եղել։ Նրա գնահատմամբ՝ այդ հատվածները էական նշանակություն ունեն գործի համար։

«Մենք մնում ենք նույն կարծիքին, որ քրեական գործում կաշառք ստանալուն, պահանջելուն, այդ հանցակազմը հիմնավորող որևէ տվյալ չկա»,- ասել է Հայրապետյանը։

Պաշտպանը նաև անդրադարձել է Վարդան Ղուկասյանի և Հենրիկ Գասպարյանի գործերի առանձին քննությանը։ Նրա խոսքով՝ պաշտպանական կողմը միջնորդել է տրամադրել քրեական գործի ամբողջ նյութերը, այդ թվում՝ այն նյութերը, որոնք ձեռք են բերվել Ղուկասյանի գործը դատարան ուղարկելուց հետո։ Սակայն, ըստ Հայրապետյանի, միջնորդությունները մերժվել են, իսկ Գասպարյանի վերաբերյալ գործն ավելի ուշ առանձին է ուղարկվել դատարան։

Նրա խոսքով՝ այժմ քննվում են երկու առանձին գործեր, որոնցից մեկում Ղուկասյանը կարող է մասնակցել իր կարգավիճակով պայմանավորված, իսկ մյուսի նյութերը պաշտպանական կողմին հասանելի չեն։

Անդրադառնալով այն տեղեկությանը, որ մեղադրանքներից մեկով Ղուկասյանն արդարացվել է՝ Հայրապետյանը պարզաբանել է, որ առայժմ հրապարակվել է միայն արդարացման վերդիկտը։ Դատավճիռը դեռ չի կայացվել․ նախ պետք է ավարտվի լրացուցիչ դատալսումների փուլը։

Պաշտպանի փոխանցմամբ՝ բացի այս գործից՝ Վարդան Ղուկասյանի վերաբերյալ քննվում է ևս երկու քրեական գործ։ Դրանցից մեկը վերաբերում է 2000-ականներին առնչվող գույքային հարցերին, մյուսը՝ ոստիկանների նկատմամբ ենթադրյալ բռնություն գործադրելուն։