TRIPP-ը կարող է ներառել մինչև 5-6 ենթակառուցվածք, այդ թվում՝ գազատար և նավթատար․ Գրիգորյան

ՀՀ փոխվարչապետ Մհեր Գրիգորյանը հայտարարել է, որ TRIPP նախագիծը վերաբերում է կոնցեսիոն իրավունքներին և որևէ կապ չունի տարածքի նկատմամբ իրավունքների տրամադրման հետ։

Նրա խոսքով՝ նախագիծը ենթադրում է մի շարք ենթակառուցվածքների շահագործման իրավունքների տրամադրում՝ հստակ սահմանված ժամկետով և պայմաններով, ընդ որում՝ պայմանագրի լուծման հնարավորությամբ։

«TRIPP-ը վերաբերում է կոնցեսիոն իրավունքներին։ Որպեսզի բացատրությունս ավելի հասկանալի լինի, բերեմ օդանավակայանի օրինակը։ Օդանավակայանը նույնպես կոնցեսիոն իրավունքով շահագործման հանձնված օբյեկտ է, որը որևէ կապ չունի տարածքի հետ։ Դա պարզապես իրավունք է, որը սահմանում է շահագործման կանոնները և թույլ է տալիս այն շահագործել հստակ սահմանված ժամկետով՝ պայմանագիրը լուծելու հնարավորությամբ»,- ասել է Գրիգորյանը։

Անդրադառնալով TRIPP-ի լայնության վերաբերյալ հարցին՝ փոխվարչապետը նշել է, որ նման հարցադրումն իրավական առումով ճիշտ չէ, քանի որ խոսքը մի քանի հնարավոր ենթակառուցվածքների կոնցեսիոն իրավունքների մասին է։

Նրա խոսքով՝ նախագիծը կարող է ներառել մինչև հինգ կամ վեց ենթակառուցվածք, այդ թվում՝ գազատար և նավթատար, որոնց տեղակայման վայրերը տարբեր են լինելու։

«Խոսել լայնության մասին պարզապես հնարավոր չէ, քանի որ մենք խոսում ենք հինգ-վեց հնարավոր ենթակառուցվածքների կոնցեսիոն իրավունքների մասին։ Դրանցով անցնող տարածքը կապ չունի կոնցեսիոն իրավունքների ընդհանուր շրջանակի հետ»,- ընդգծել է նա։

Գրիգորյանը նշել է, որ եթե խոսքը TRIPP իրավաբանական անձի մասին է, ապա «իրավաբանական անձի լայնություն» հասկացություն գոյություն չունի։

Փոխվարչապետի խոսքով՝ նախագծի շրջանակում նախատեսվող ենթակառուցվածքները կարող են ներառել երկաթուղի, միջազգային չափանիշներին համապատասխանող ավտոճանապարհ և էլեկտրահաղորդման գծեր։