Բժիշկը մատնանշել է առօրյա սովորություններ, որոնք բարձրացնում են խոլեստերինի մակարդակը

HuffPost-ին տված հարցազրույցում ընդհանուր պրակտիկայի բժիշկ Դոնալդ Գրանտը մատնանշել է առօրյա երկու սովորություն, որոնք հանգեցնում են խոլեստերինի մակարդակի աստիճանական բարձրացմանը։

Առաջինը ենթադրում է աղցաններից խուսափել՝ միաժամանակ կանոնավոր կերպով օգտագործելով յուղոտ սնունդ, արագ սնունդ (ֆասթ ֆուդ) և ալկոհոլ։ Ֆիզիկական ակտիվության պակասը, օրինակ՝ երեկոներն անկողնում կամ բազմոցին պառկած անցկացնելը, նույնպես նպաստում է խոլեստերինի մակարդակի բարձրացմանը։

«Այս գործոններից ոչ մեկը խնդիր չի առաջացնում մեկ գիշերվա ընթացքում, սակայն դրանց հետևանքները կարող են կուտակվել մի քանի ամսվա ընթացքում», — պարզաբանել է բժիշկը։

Մասնագետի խոսքով՝ ռիսկի գործոններից մեկը հագեցած ճարպերով հարուստ սննդակարգն է։ Արագ սննդի, բարձր կալորիականությամբ կերակուրների և ալկոհոլի հաճախակի օգտագործումը կարող է բացասաբար ազդել արյան անալիզների արդյունքների վրա։ Այս իրավիճակն ավելի է սրվում նստակյաց կենսակերպի պատճառով, մասնավորապես՝ երբ մարդն իր ազատ ժամանակն անցկացնում է բազմոցին՝ զբոսանքների կամ ֆիզիկական այլ ակտիվության փոխարեն։

Նման սովորությունների հետևանքներն անմիջապես չեն ի հայտ գալիս։ Ինչպես բացատրում է բժիշկը, եթե մարդը հետևողականորեն վարում է նման կենսակերպ, ապա օրգանիզմի վրա բացասական ազդեցությունը կարող է կուտակվել ամիսների ընթացքում։

Այս խնդիրը հատկապես արդիական է դառնում աշնանը, երբ մարդիկ ավելի հազվադեպ են դուրս գալիս տնից, նվազեցնում են ֆիզիկական ակտիվությունը և նախընտրում ավելի ծանր, բարձր կալորիականությամբ սնունդ։ Թեև բժիշկը նշում է, որ երբեմն նման հանգստին տրվելը միանգամայն ընդունելի է, սակայն եթե դա կրկնվում է ամեն օր, ապա գարնան գալուն պես առողջական ցուցանիշները կարող են վատթարանալ։