Ոստիկանությունը դադարեցրել է բողոքի ակցիան Գերմանիայի Շտուտգարտ քաղաքում՝ ճայթռուկների և դիմակավորված մասնակիցների պատճառով

Ոստիկանությունը շաբաթ օրը դադարեցրել է ցույցը Գերմանիայի Շտուտգարտ քաղաքում այն բանից հետո, երբ որոշ մասնակիցներ սկսել են ճայթռուկներ պայթեցնել և ծխագլանակներ ետել, ինչպես նաև ծածկել դեմքերը, հաղորդել է dpa-ն։

Իրավապահները ցուցարարներից պահանջել են հանել դիմակները և հետևել համաձայնեցված երթուղուն՝ նախքան երթի շարունակումը թույլ տալը։

«Երթը կարող է շարունակվել միայն այն դեպքում, եթե բոլորը հեռացնեն դեմքը ծածկող իրերը», — հայտարարել է ոստիկանությունը WhatsApp-ի իր ալիքում։

Ոստիկանության ներկայացուցիչը հրապարակված տեսանյութում հայտնել է, որ ծխագլանակներ են գործարկվել դեռևս երթի մեկնարկից առաջ, ինչպես նաև լսվել են ճայթռուկների պայթյուններ։ Նրա խոսքով՝ նման վարքագիծն անթույլատրելի է։ Նա մասնակիցներին կոչ է արել իրենց տեսակետներն արտահայտել խաղաղ ճանապարհով։ Բացի այդ, որոշ ցուցարարներ շեղվել են համաձայնեցված երթուղուց, ինչից հետո երթը կասեցվել է, և նրանցից պահանջվել է վերադառնալ հաստատված երթուղուն։

Շտուտգարտի ակցիան Գերմանիայի ավելի քան 30 քաղաքներում ծրագրված համազգային բողոքի ցույցերի մի մասն էր։ Մի շարք այլ բնակավայրերի ոստիկանության հաղորդումների համաձայն՝ այնտեղ ցույցերը մեկնարկել են առանց միջադեպերի։

Մասնակիցները հանդես են գալիս կենսապահովման ծախսերի նվազեցման և դպրոցների, կախվածություններ ունեցող մարդկանց աջակցության ծառայությունների և հոգեթերապիայի ֆինանսավորման ավելացման օգտին։ Նրանք նաև վճռականորեն դեմ են պարտադիր զինվորական ծառայության ներդրմանը։

Հարևան եվրոպական երկրներում բողոքի ցույցերի ընթացքում բռնության բռնկումների ֆոնին գերմանացի գործարարներն ու քաղաքական գործիչները մտավախություն ունեն, որ նման անկարգություններ կարող են տեղի ունենալ նաև Գերմանիայում։ «Gen Z regelt» («Z սերունդը իրավիճակն իր ձեռքն է վերցնում») շարժման կազմակերպիչները և երկրամասի աշակերտական խորհուրդը մասնակիցներին կոչ են արել պահպանել ցույցերի խաղաղ բնույթը։