Մոհսեն Ռեզայի․ ԱՄՆ-ի նոր ուղերձի տոնն էապես փոխվել է

Իրանի Ազգային անվտանգության բարձրագույն խորհրդի քարտուղար Մոհսեն Ռեզային հայտարարել է, որ ԱՄՆ-ի նոր ուղերձի տոնն էապես տարբերվում է Վաշինգտոնի նախորդ ուղերձներից, հաղորդում է Tasnim-ը։

Ըստ նրա, նամակը Իրանի արտաքին գործերի նախարարությանն է փոխանցվել ԱՄՆ-ի միջնորդների միջոցով։ Նախնական ուսումնասիրությունից հետո Թեհրանը դեռ պատասխան չի ուղարկել։

Ռեզային ամերիկյան կողմի տոնի փոփոխությունն անվանել է Իրանի դիրքերի ամրապնդման և իրանցի ժողովրդի հաղթանակի վկայություն։

Անդրադառնալով միջուկային քաղաքականությանը՝ նա նշել է, որ իրանական միջուկային օբյեկտների վրա հարձակումներից հետո հասարակության շրջանում և խորհրդարանի որոշ պատգամավորների կողմից կոչեր են հնչում վերանայելու միջուկային դոկտրինը՝ պատերազմի վերսկսման դեպքում։

Ինչպես հիշեցրել է Ռեզային, հակառակորդը հարձակվել է Իրանի միջուկային օբյեկտների վրա՝ չնայած լիարժեք ստուգումների անցկացմանը և Ատոմային էներգիայի միջազգային գործակալության (ԱԷՄԳ)՝ առցանց ռեժիմով գործող տեսախցիկների տեղադրմանը։

Միևնույն ժամանակ Իրանի կառավարությունը կամ Ազգային անվտանգության բարձրագույն խորհուրդը միջուկային դոկտրինի փոփոխության վերաբերյալ որևէ պաշտոնական որոշում դեռ չեն ընդունել։

Ավելի վաղ ամերիկյան լրատվամիջոցներում տեղեկություն էր հայտնվել մի նամակի մասին, որն ԱՄՆ փոխնախագահ Ջեյ Դի Վենսն ուղարկել էր Իրանի ղեկավարությանը։ Սակայն ԱՄՆ նախագահ Դոնալդ Թրամփը հերքել էր, որ հանձնարարել է բանակցություններ վարել Թեհրանի հետ։

Մինչդեռ Իրանը հաստատել է նամակը ստանալը։