Լեհ ոստիկանները ղեկավարությունից պարզաբանումներ են պահանջել Սահմանադրական տրիբունալի մոտ իրենց գործողությունների օրինականության վերաբերյալ

Լեհական «Ոստիկանական համերաշխություն» արհմիությունը ոստիկանության գլխավոր հրամանատար Մարեկ Բորոնից պահանջել է հրապարակայնորեն պարզաբանել Վարշավայում Սահմանադրական տրիբունալի մոտ իրավապահների գործողությունների իրավական հիմքերը, հայտնում է լեհական Zero պորտալը։

Հոկտեմբերի 31-ի բաց նամակում կազմակերպությունը հայտարարել է, որ աշխատակիցները մտավախություն ունեն, որ ղեկավարության հրամանները կատարելու համար կարող են ենթարկվել քրեական հետապնդման, իսկ իրավիճակն արդեն բացասաբար է անդրադարձել ոստիկանների բարոյահոգեբանական վիճակի վրա։

Արհմիությունը հայտնել է, որ դիմումներ է ստանում երկրի տարբեր շրջանների աշխատակիցներից, որոնք կասկածում են տրիբունալի շենքի մոտ ոստիկանության գործողությունների օրինականությանը։ Մասնավորապես, կազմակերպությունը մատնանշել է պետության սահմանադրական մարմնի գործունեությանը հնարավոր միջամտությունը և Լեհաստանի քրեական օրենսգրքի այն հոդվածների խախտման վտանգը, որոնք պատասխանատվություն են նախատեսում պետական հեղաշրջման, սահմանադրական մարմինների վրա բռնի ներգործության և պաշտոնեական լիազորությունների գերազանցման համար։

Նամակում նաև նշվում է, որ Վարշավայում կարգուկանոն ապահովելու համար ուղարկվել են նաև երիտասարդ ոստիկաններ, որոնք վերջերս են ավարտել հիմնական ուսուցման դասընթացը և նման իրավիճակներում աշխատելու բավարար փորձ չունեն։

Արհմիությունը տեղեկացրել է, որ աշխատակիցների հարազատները դիմում են կազմակերպությանը՝ մտահոգվելով իրենց մտերիմների անվտանգության և նրանց հնարավոր իրավական պատասխանատվության համար։ Նամակի հեղինակները նախազգուշացրել են, որ աջակցության բացակայության զգացումը կարող է ոստիկանների շրջանում հանգեցնել «դժգոհության արտահայտման տարբեր ձևերի»։

Կազմակերպությունը ոստիկանության ղեկավարությանը կոչ է արել հրապարակայնորեն ներկայացնել իր դիրքորոշումը և պաշտպանել աշխատակիցներին քաղաքական պայքարի գործիքի վերածվելուց։