WSJ. Թրամփը Նեթանյահուի հետ քննարկել է Իրանին նոր հարվածներ հասցնելու հարցը

ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն շաբաթ առավոտյան հեռախոսազրույց են ունեցել՝ Իրանի դեմ հարվածների հնարավոր վերսկսմանը Վաշինգտոնի նախապատրաստվելու ֆոնին, հայտնում է The Wall Street Journal-ը՝ հղում անելով զրույցի բովանդակությանը ծանոթ աղբյուրներին։

Նույն օրը՝ ավելի ուշ, Թրամփը Ֆլորիդայում լրագրողներին հայտնել է, որ ԱՄՆ-ին մնացել է Իրանում ևս մեկ կամ երկու թիրախ խոցել։ Մասնավորապես, նա հիշատակել է Փիքաքս լեռը, որն արևմտյան հետախուզական ծառայությունները համարում են միջուկային նյութերի պահպանման հնարավոր վայր։

«Մենք դեռ պետք է զբաղվենք, ես կասեի, մեկ կամ երկու օբյեկտով, բայց կարող ենք դա անել տասը րոպեում», — հայտարարել է Թրամփը։

Միաժամանակ նա նշել է, որ Իրանի հետ բանակցությունները «լավ են ընթանում», թեև Իսլամական Հանրապետությունն անվանել է անվստահելի։

Շաբաթ օրը Իրանի ներկայացուցիչները Դոհայում բանակցություններ են վարել Կատարի միջնորդների հետ՝ քննարկելով Պարսից ծոցում պատերազմին վերջ տալու ուղիները։ Բանակցությունների ընթացքին ծանոթ, Reuters-ի աղբյուրի տվյալներով, հանդիպմանը նախորդել են ուրբաթ օրը Թեհրանում Իրանի և Կատարի ներկայացուցիչների միջև ավելի քան 12 ժամ տևած քննարկումները։ Շփումները համակարգվում են Վաշինգտոնի հետ կանոնավոր փոխգործակցությամբ։

Ավելի վաղ MS NOW հեռուստաալիքը, հղում անելով Պարսից ծոցի երկրների երեք բարձրաստիճան ներկայացուցիչների, հայտնել էր, որ ԱՄՆ-ն տարածաշրջանային դաշնակիցներին նախազգուշացրել է Իրանին հարվածների հնարավոր նոր շարքի մասին արդեն նոյեմբերի 4-ին՝ Կոնգրեսի միջանկյալ ընտրությունների հաջորդ օրը։ Աղբյուրների տվյալներով, գործողությունը կարող է լինել կարճատև, բայց ինտենսիվ։ Տարածաշրջանի երկրները Վաշինգտոնին կոչ են անում թուլացնել լարվածությունը՝ մտավախություն ունենալով Իրանի պատասխան հարձակումներից։