Միչիգանում տղամարդու են ձերբակալել՝ ՀԴԲ ղեկավարին սպանության սպառնալիքներ հնչեցնելու մեղադրանքով

ԱՄՆ Միչիգան նահանգում ձերբակալվել է 42-ամյա Էնթոնի Դենիել Պալացոլոն, որը մեղադրվում է ՀԴԲ տնօրեն Քեշ Փաթելին և նրա ծանոթին սպանության սպառնալիքներ հնչեցնելու մեջ, հայտնում է CNN-ը։

Միչիգանի Արևելյան շրջանի դատախազության տվյալներով, հոկտեմբերի սկզբին Պալացոլոն Facebook-ի միջոցով սպառնալից հաղորդագրություններ է ուղարկել Փաթելին և մեկ այլ անձի։

Դրանցից մեկում՝ հոկտեմբերի 8-ով թվագրված հաղորդագրության մեջ, նա անհայտ հասցեատիրոջը գրել է. «Ես պատվիրել եմ քո սպանությունը»՝ հավելելով, որ Փաթելը «նույնպես դիակ է»։ Երկրորդ անձի ինքնությունը չի բացահայտվում։

Քննիչները կասկածյալի գտնվելու վայրը պարզել են Facebook-ում և TikTok-ում նրա հաշիվների միջոցով։ Հոկտեմբերի 9-ին ՀԴԲ գործակալներն այցելել են նրա տուն՝ Դետրոյթից մոտ 48 կիլոմետր հյուսիս գտնվող Չեսթերֆիլդ բնակավայրում։

Գործի նյութերի համաձայն, Պալացոլոն հայտարարել է, որ ցանկացել է իշխանությունների ուշադրությունը հրավիրել իր գույքային իրավունքների ենթադրյալ խախտման վրա։ Նա ընդունել է, որ ուղարկել է հաղորդագրությունները, ներողություն է խնդրել և պնդել, որ մտադիր չէր որևէ մեկին վնաս պատճառել։ Ըստ նրա, ինքը նաև դիմել է մի քանի դաշնային իրավապահ գերատեսչությունների, քանի որ իր բողոքներին նրանց արձագանքը բավարար չի համարել։

Սակայն, ինչպես նշվում է մեղադրական փաստաթղթում, հոկտեմբերի 12-ին կասկածյալը սեռական բռնության սպառնալիքներ պարունակող էլեկտրոնային նամակներ է ուղարկել ՀԴԲ օպերատիվ խմբի աշխատակցին, Տեխասի դաշնային դատարանին, ԱՄՆ Գաղտնի ծառայությանը և Գերագույն դատարանին։ Հաջորդ օրը նա ՀԴԲ աշխատակցին երկու ձայնային հաղորդագրություն է թողել, որոնցում սպառնացել է մահաբեր ուժ կիրառել դաշնային պաշտոնյաների դեմ։

Պալացոլոյին մեղադրանք է առաջադրվել միջնահանգային կապի միջոցներով սպառնալիքներ փոխանցելու համար։ Ուրբաթ նա ներկայացել է Միչիգանի դաշնային դատարան։ Դատավորը կարգադրել է նրան ժամանակավորապես պահել կալանքի տակ. հետագա կալանքի հարցով լսումը նշանակված է երկուշաբթի։ Կասկածյալը դեռ չի հայտարարել՝ իրեն մեղավոր ճանաչո՞ւմ է, թե՞ ոչ։

Մարտին Մասաչուսեթսում նույնպես ձերբակալվել էր մի տղամարդ, որը մեղադրվում է Փաթելի հարսնացու Ալեքսիս Ուիլքինսին սպառնալիքներ ուղարկելու մեջ։ Նա իրեն մեղավոր չի ճանաչել։ Դատավարությունը նշանակված է փետրվարին։