Գերմանիայի գազապահեստարանները լցված են ընդամենը 61,5%-ով

Գերմանիան չի ապահովել մինչև նոյեմբերի 1-ը գազապահեստարանների լցվածության սահմանված նորմերը․ դրանց լցվածության ընդհանուր մակարդակը կազմում է 61,5%, մինչդեռ օբյեկտների մեծ մասի համար պարտադիր ցուցանիշը 80% է։ Վեց պահեստարանների համար գործում է նվազեցված նորմ՝ 45%, հայտնում է Գազի պահեստավորման գերմանական նախաձեռնությունը (INES)։

Կազմակերպությունը կարծում է, որ թիրախային ցուցանիշների չապահովումը վկայում է ձմռանը երկիրը գազով ապահովելու միջոցառումները վերանայելու անհրաժեշտության մասին։ Ապագա կանոնները պետք է երաշխավորեն բավարար պաշարների կուտակումը՝ տարվա ցուրտ եղանակին պահանջարկը բավարարելու համար։

INES-ը ողջունել է Գերմանիայի էկոնոմիկայի և էներգետիկայի դաշնային նախարարության պատրաստակամությունը՝ քննարկելու գազամատակարարների համար պահեստարաններն օգտագործելու պարտավորություններ սահմանելու հարցը։

«Թիրախային ցուցանիշների չապահովումը ցույց է տալիս, որ առաջիկա ձմեռներին գազապահեստարանների լցվածությունը պետք է ապահովել ավելի պարտադիր մեխանիզմներով», — հայտարարել է INES-ի գործադիր տնօրեն Սեբաստիան Հայներմանը։ Նրա կարծիքով, նման պարտավորությունների կոնկրետ տարբերակները պետք է քննարկել անհապաղ՝ դրանք հնարավորինս շուտ օրենսդրորեն ամրագրելու համար։

Գազատրանսպորտային համակարգերի օպերատորների FNB Gas միավորման հետ համատեղ INES-ը պատրաստել է գազի պարտադիր պահեստավորման կազմակերպման վերաբերյալ առաջարկների փաստաթուղթ։ Ոլորտային միավորումները կոչ են անում արագացնել նոր կանոնների քննարկումը, որոնք պետք է ապահովեն Գերմանիայի առավել հուսալի նախապատրաստումը ձմռանը։