Հնդկաստանի ռազմածովային ուժերը 48-ժամյա գործողության արդյունքում ազատագրել են ծովահենների կողմից գրավված իրանական նավը․ փրկվել է 20 մարդ

Հնդկաստանի ռազմածովային ուժերը հաջողությամբ ավարտել են 48-ժամյա գործողությունը՝ Սոմալիի ափերի մոտ զինված ծովահեններից իրանական «Azini» ձկնորսական նավն ազատագրելու նպատակով։

Նշվում է, որ նավը ծովահենները գրավել էին նախորդ ամիս՝ Սոմալիի հյուսիսարևելյան ափերի մոտ։ Այն կարող էր օգտագործվել որպես ծովահենների հարձակումների համար նախատեսված «լողացող բազա»՝ լուրջ վտանգ ներկայացնելով ծովային անվտանգության համար։

Գործողության ընթացքում Հնդկաստանի ռազմածովային ուժերը դեպքի վայր են ուղարկել ռազմանավ և ծովային հետախուզական ինքնաթիռ։ Նավի նկատմամբ սահմանվել է մշտական վերահսկողություն, իսկ դրա տեղաշարժը սահմանափակվել է հատուկ միջոցներով։

Այնուհետև Հնդկաստանի ռազմաօդային ուժերի C-17 ինքնաթիռից դեսանտ է իջեցվել, որի աջակցությամբ չեզոքացվել է ծովահենների սպառնալիքը։

Արդյունքում ազատ են արձակվել նավի անձնակազմի բոլոր 20 անդամները, որոնք Իրանի քաղաքացիներ են։