Մեծ Բրիտանիան և ԵՄ-ն մոտենում են մերձեցման․ համաձայնեցվել է նոր գործարքի նախագիծը

Մեծ Բրիտանիան և Եվրամիությունը համաձայնեցրել են Brexit-ից հետո սննդամթերքի և գյուղատնտեսական արտադրանքի առևտրի նկատմամբ սահմանված ստուգումներն ու բյուրոկրատական խոչընդոտները վերացնելու համաձայնագրի նախագիծը։ Այս մասին հայտնում է BBC-ն։

Նախագիծը նախատեսում է վերացնել ԵՄ արտահանվող և ներմուծվող ապրանքների մի շարք պարտադիր սերտիֆիկատների, տեսուչների ծառայությունների, նավահանգստային վճարների և լրացուցիչ ստուգումների անհրաժեշտությունը։ Մեծ Բրիտանիայի կառավարությունը գնահատում է, որ համաձայնագիրը երկրի տնտեսությանը տարեկան կարող է ապահովել 5,1 միլիարդ ֆունտի տնտեսական օգուտ։

Համաձայնագրի շրջանակում կվերականգնվի նաև բրիտանական թարմ երշիկեղենի, բուրգերների, ծովամթերքի և սերմացու կարտոֆիլի արտահանումը ԵՄ։ Բրիտանացիները նաև կկարողանան իրենց ընտանի կենդանիների հետ մեկնել Եվրամիություն՝ առանց նախկին բարդ ընթացակարգերի։

Փոխարենը՝ Լոնդոնը պարտավորվելու է հետևել ԵՄ գործող կանոնակարգերին և համապատասխանեցնել դրանց իր օրենսդրությունը՝ բույսերի, կենդանիների և սննդամթերքի առևտրի ոլորտում։

Նախագիծը դեռ պետք է քննարկվի ԵՄ անդամ երկրների ներկայացուցիչների կողմից։ Այն կդառնա Brexit-ից հետո Լոնդոնի և Բրյուսելի հարաբերությունները վերականգնելու ամենանշանակալի քայլերից մեկը։

Միևնույն ժամանակ, բրիտանական գործարար շրջանակները կոչ են անում կառավարությանը դիտարկել ԵՄ-ի հետ ավելի սերտ տնտեսական կապերի հնարավորությունները։ Մեծ Բրիտանիայի առևտրի պալատի հարցման համաձայն՝ արտահանող ընկերությունների 56 տոկոսը ցանկանում է վերացնել ԵՄ մաքսային փաստաթղթերն ու ձգձգումները։

Մեծ Բրիտանիայի վարչապետը հայտարարել է, որ ցանկանում է առաջիկա գագաթնաժողովում քննարկել Եվրամիության հետ հարաբերությունների երկարաժամկետ հեռանկարը՝ չբացառելով անգամ միությանն անդամակցելու հարցը։