Binance-ի 6.3 մլրդ դոլարի կիբերհարձակումը․ Հյուսիսային Կորեան հերքում է մեղադրանքները

Հյուսիսային Կորեան հերքել է աշխարհում խոշորագույններից մեկը համարվող՝ Binance կրիպտոարժութային բորսայից 6.3 միլիարդ դոլարի գողությանն իր մասնակցության մասին մեղադրանքները՝ դրանք անվանելով «անհեթեթ պնդումներ». փոխանցում է BBC-ն։

Երկրի առաջնորդ Կիմ Չեն Ընի քույրը՝ Կիմ Յո Ջոնգը, հայտարարել է, որ մեղադրանքներն ԱՄՆ-ի հերթական փորձն են՝ վնասելու Փհենյանի միջազգային հեղինակությանը։ Նրա խոսքով՝ Վաշինգտոնը փորձում է միջազգային հանրության շրջանում տպավորություն ստեղծել, թե աշխարհի տարբեր հատվածներում տեղի ունեցող կիբերհանցագործությունների հետևում Հյուսիսային Կորեան է կանգնած։

ԱՄՆ Հետաքննությունների դաշնային բյուրոն (ՀԴԲ), Գաղտնի ծառայությունը և կիբերանվտանգության մասնագետները պնդում են, որ հարձակումը կազմակերպել է Հյուսիսային Կորեան։ Նրանց տվյալներով՝ կիբերհարձակման հետևում կանգնած է պետական աջակցություն ստացող TraderTraitor խումբը, որը հայտնի է նաև Lazarus Group անվամբ։ ՀԴԲ-ն կոչ է արել ոլորտի ընկերություններին արգելափակել այդ խմբի հետ կապվող կրիպտոարժութային հաշիվներով գործարքները։

Փհենյանը նախկինում ևս մեղադրվել է խոշոր կիբերհարձակումների կազմակերպման մեջ, սակայն մշտապես հերքել է այդ պնդումները։ Նույն խմբին էր վերագրվել նաև 2025 թվականին Bybit կրիպտոբորսայից 1.5 միլիարդ դոլարի գողությունը։

Binance-ի նախնական հետաքննության համաձայն՝ հարձակվողներին հասանելիություն է հաջողվել ստանալ ինժեների նոութբուքին, ինչի միջոցով իրականացվել են չարտոնված փոխանցումներ։

Հարձակման հետևանքով տուժած ակտիվների մի մասը սառեցնելուց հետո բորսան վերսկսել է խոշոր կրիպտոարժույթների առևտուրը։ Binance-ի տվյալներով՝ գործարքների վերսկսումից հետո բորսայից զուտ 5.27 միլիարդ դոլարի միջոցներ են դուրս բերվել, սակայն գործարքների ծավալներն այժմ կայունացել են։

Ընկերությունը հայտարարել է, որ ամբողջությամբ կփոխհատուցի հարձակման հետևանքով առաջացած կորուստները։ Բորսայի փոխանցմամբ՝ գողացված ակտիվների շուրջ 95 տոկոսն արդեն փոխհատուցվել է։