«Մեզ ապագայից զրկում են»․ Gen Z-ի բողոքի ալիքը տարածվում է Եվրոպայում

Եվրոպայի մի շարք երկրներում երիտասարդները դուրս են եկել փողոց՝ բողոքելու կյանքի թանկացման, բնակարանների անմատչելիության, ցածր աշխատավարձերի և ապագայի անորոշության դեմ։ Ֆրանսիայում, Բելգիայում, Գերմանիայում, Իտալիայում, Պորտուգալիայում և Իսպանիայում անցկացվող ցույցերին մասնակցել են հարյուր հազարավոր մարդիկ։

Բողոքի ալիքը սկզբում ակտիվացել է Ֆրանսիայում, որտեղ սեպտեմբերի կեսերից դպրոցականներն ու ուսանողները պահանջել են բարելավել կրթական պայմանները և ապահովել բուհեր ընդունվելու գործընթացի թափանցիկությունը։ Հոկտեմբերի 17-ին Ֆրանսիայում ցույցերին մասնակցել է շուրջ 550 հազար մարդ։ Սկզբնական շրջանում խաղաղ հավաքները հետագայում որոշ վայրերում ուղեկցվել են թալանով, հրկիզումներով և ոստիկանության հետ բախումներով։

Մի քանի օր անց ավելի քան 10 հազար մարդ է հավաքվել նաև Հունաստանում։ Փորձագետների կարծիքով՝ երիտասարդների դժգոհության հիմքում ոչ միայն ֆինանսական դժվարություններն են, այլև աշխատանքի անկայունությունը, բարձր վարձավճարները, սոցիալական անհավասարությունն ու ավագ սերնդի նկատմամբ անվստահությունը։ Շատերը կարծում են, որ նույնիսկ բարձրագույն կրթությունը այլևս չի երաշխավորում ծնողների սերնդի ունեցած կենսամակարդակը։

Երիտասարդները նաև մտահոգված են նախորդ սերունդներից ժառանգած պետական պարտքի և բնապահպանական խնդիրների պատճառով։ Որոշ երկրներում դժգոհության պատճառ են դարձել նաև հնարավոր պարտադիր զինվորական ծառայության վերականգնման ծրագրերը։ Բողոքի շարժումները կարող են ազդել առաջիկա քաղաքական գործընթացների վրա, քանի որ հաջորդ տարի ընտրություններ են նախատեսված Իսպանիայում, Ֆրանսիայում, Իտալիայում և Հունաստանում։